कृषि फार्ममा आगलागि हुँदा ४ बाख्रा जलेर मरे, १८ बाख्रा घाइते
भञ्ज्याङ न्यूज
तनहुँको देवघाट गाउँपालिका-५ कालिमाटीस्थित भट्टराइ कृषि बाख्रा फार्ममा आगलागि हुँदा ब्याउने ४ वटा बाख्रा जलेर मरेका छन् ।
आइतबार बिहान करिब १:३५ बजेको समयमा भएको आगलागिमा परि १८ वटा बाख्रा जलेर घाइते भएका तनहुँ प्रहरीले जनाएको छ ।
आगलागिको सूचना पाउनसाथ स्थानीय र प्रहरीले बिहान करिव ३ बजेसम्म आगो नियन्त्रणमा लिएका थिए । आगो के कसरी लाग्यो भन्ने विषयमा खुल्न नसकेको र यस विषयमा अनुसन्धान भइरहेको प्रहरी नायव उपरीक्षक मोहनबहादुर खाँणले बताए ।
हिउँदको समय सुख्खा पराल, खर, घर, गोठहरुमा डढेलो तथा आगलागिको प्रकोप जस्ता घटनाहरु बढी हुने हुँदा सम्पुर्ण नागरिकहरुमा सजक, सतर्क र साबधानी अपनाउन जिल्ला प्रहरी कार्यालय तनहुँले अनुरोध गरेको छ ।
