तनहुँ-१ उपनिर्वाचन : कांग्रेसका ६ जनाको दरखास्त, नेकपा माओवादीबाट ७ जनाको नाम लिस्ट तयार
भञ्ज्याङ न्यूज
गत मंसिर ४ गते सम्पन्न प्रतिनिधिसभा सदस्य निर्वाचनबाट तनहुँ क्षेत्र नं. १ बाट निर्वाचित नेपाली कांग्रेसका वरिष्ठ नेता रामचन्द्र पौडेल राष्ट्रपतिमा निर्वाचित भएपछि यो क्षेत्रमा उपनिर्वाचन हुने भएको छ ।
निर्वाचन आयोगले अगामि वैशाख १० गते उपनिर्वाचन गर्ने मिति तोकेसंगै विभिन्न राजनीतिक दलहरु यतिबेला निर्वाचनको तयारीमा जुटेका छन् ।
तनहुँ-१ को उपनिर्वाचनका लागि उम्मेदवार बन्न नेपाली कांग्रेसमा शुक्रबार छ जनाले दरखास्त दिएका छन् । तनहुँ क्षेत्र नम्बर १ प्रतिनिधिसभा सदस्य क्षेत्रीय कार्यसमितिले आवेदन मागेको पहिलो दिन छ जनाले दरखास्त हालेका हुन् ।
पूर्व सभापति रघुनाथ पौडेल, केन्द्रीय सदस्य गोविन्द भट्टराइ, महाधिवेशन प्रतिनिधि रामचन्द्र अधिकारी, दिपक भट्टराइ, लक्ष्मी आचार्य र आँबुखैरेनी सभापति विष्णु पन्तले दरखास्त दिएका क्षेत्रीय सचिव दयानिधी नरालले जानकारी गराए ।
उम्मेदवार आंकाक्षीसँग ६ हजार शुल्क लिइएको छ । शनिबार पनि आकांक्षीले दरखास्त दिन सक्नेछन् । क्षेत्रीय समितिले चैत १५ भित्र उम्मेदवारको नामावली प्रदेशमा सिफारिस गर्ने बताइएको छ ।
यस्तै, वैशाख १० गते हुने उपनिर्वाचन हुनेभएपछि नेकपा माओवादी केन्द्रले दावी गरेको छ । नेकपा माओवादीका केन्द्रीय सदस्य हरिबहादुर चुमान, आशा कोइरालाको उपस्थितिमा बन्दिपुरमा बसेको बैठकले तनहुँ-१ को रिक्त रहेको प्रतिनिधिसभा सदस्यमा दावी गर्ने निर्णय गरेको हो ।
मंसिर ४ गते सम्पन्न निर्वाचनमा माओवादीसँगको गठबन्धनमा नेपाली कांग्रेसका वरिष्ठ नेता रामचन्द्र पौडेल निर्वाचित भई हाल राष्ट्रपति बनेपछि यस क्षेत्रमा माओवादीले दावी गर्ने माओवादी केन्द्र बन्दिपुरका नेता पूर्णसिं थापाले बताए ।
माओवादी केन्द्रले सम्भावित उम्मेदवारको लिष्ट समेत तयार पारेको नेता थापाले बताए । उनका अनुसार पार्टीका केन्द्रीय कोषाध्यक्ष श्रीराम ढकाल, केन्द्रीय सदस्य ओमकुमारी पौडेल, वैकल्पिक सदस्य हेमराज लामिछाने, गीता शाही, सूर्य गौली, भिम राना र पूर्णसिं थापामध्ये एकलाई उम्मेदवार बनाउने निर्णय गरिएको छ ।
निर्वाचन आयोगले चैत २० गते उम्मेदवारी दर्ताको कार्यतालिका सार्वजनिक गरेको छ ।
