म्याग्देको पन्ध्रौ गाउँसभा : चार ऐन पारित

तनहुँको म्याग्दे गाउँपालिकाले पन्धौं गाउँसभा सम्पन्न गरेको छ । गाउँपालिकाले सोमबार आयोजना गरेको गाउँसभाबाट चार वटा ऐन पारित गरेको छ ।

गाउँपालिकाको नगर प्रहरी ऐन २०८०, वातावरण संरक्षण तथा फोहरमैला व्यवस्थापन ऐन २०८०, आर्थिक कार्यविधि नियमित तथा व्यवस्थापन गर्न बनेको ऐन २०८० र म्याग्दे गाउँपालिकाको स्वास्थ्य व्यवस्थापन तथा सरसफाई ऐन (पहिलो संशोधन) २०८० गाउँसभाबाट पारित भएको गाउँपालिकाका प्रमुख प्रशासकीय अधिकृत नारायणप्रसाद अधिकारीले जानकारी गराए ।

गाउँसभाबाट ऐन पारित भएसँगै नगर प्रहरी नियुक्तिका लागि बाटो खुलेको छ । गाउँपालिकामा हालसम्म नगर प्रहरी राखेको छैन । नगरी प्रहरी व्यवस्थापन ऐन २०८० को दफा १० मा भएको व्यवस्था अनुसार नगर प्रहरी पदपुर्तिका लागि प्रमुख प्रशासकीय अधिकृत अधिकारीको संयोजकत्वमा ५ सदस्यीय समिति गठन गरिएको छ ।

गाउँसभामा संस्थागत क्षमता विकास तथा सेवा प्रवाह समिति संयोजक चिनीमाया थापाले पालिकाको आर्थिक कार्यविधि नियमित तथा व्यवस्थित गर्न बनेको विधेयक २०८० पेश गरेकी थिइन् । त्यसैगरि वातावरण समितिका संयोजक शिव वहादुर आलेले पालिकाको वातावरण संरक्षण तथा फोहोरमैला व्यवस्थापन गर्न बनेको विधेयक २०८० पेश गरेका थिए ।

नगर प्रहरी व्यवस्थापन गर्न बनेको विधेयक २०८० संस्थागत क्षमता विकास तथा सेवा प्रवाह समिति संयोजक चिनीमाया थापाले पेश गरेका थिए । गाउँसभामा न्यायिक समितिको अर्धवार्षिक प्रतिवेदन संयोजक बालकृष्ण घिमिरे, सार्वजनिक लेखा समितिको अर्धवार्षिक प्रतिवेदन संयोजक शिव बहादुर क्षेत्री, सुशासन समितिको अर्धवार्षिक प्रतिवेदन संयोजक सुनिता नेपालीले पेश गरेका थिए ।

गाउँपालिका अध्यक्ष श्रीप्रसाद श्रेष्ठको अध्यक्षतामा आयोजित गाउँसभामा पालिकाका उपाध्यक्ष वालकृष्ण घिमिरेले संकल्प प्रस्ताव पेश गरेका थिएभने समितिका संयोजकहरुले सभामा विधेयक पेश गरेका थिए । गाउँसभाले ३० वटा नीतिगत निर्णयहरु समेत पारित गरिएको बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर