पृथ्वीराजमार्ग विस्तार : पूर्वी खण्डमा २५, पश्चिम खण्डमा ६ प्रतिशत प्रगति
भञ्ज्याङ न्यूज
पृथ्वीराजमार्ग विस्तार तथा स्तरोन्नती कार्य भइरहेको छ । बजार क्षेत्रमा छ र अन्य क्षेत्रमा चार लेनमा सडक विस्तार गर्ने उद्देश्यसहित राजमार्गको मुग्लिन-पोखरा सडक खण्डलाई दुइ खण्डमा विभाजन गरी काम भइरहेको छ । सडक विस्तार योजनाको आँवुखैरेनी-जामुने (पूर्वी खण्ड)मा २५ र जामुने-कास्की (पश्चिम खण्ड)मा ६.०५ प्रतिशत भौतिक प्रगति हासिल भएको योजनाले जनाएको छ । पूर्वी खण्डको काम केही सन्तोषजनक देखिए पनि पश्चिम खण्डको काम भने निकै सुस्त गति भएको छ ।
मुग्लिन-पोखरा सडक योजना (पूर्वी खण्ड) का प्रमुख नरेन्द्र सुवेदीले यो खण्डमा सडक फराकिलो बनाउने, पक्की पुल तथा कल्भर्ट निर्माणको काम भइरहेको बताए । साथै सबवेश र फेसको काम पनि सुरु गर्न लागिएको सुवेदीले बताए ।
उक्त खण्डमा विद्युत्का खम्बा स्थानान्तरणको कामले समस्या भएपनि उक्त समस्या समाधान हुँदै गएको सुवेदीले बताए । पूर्वीखण्ड अन्तर्गत आँबुखैरेनी खण्डमा सात किलोमिटर कालोपत्रको तयारी गरिएको छ । सुवेदीका अनुसार चालु आर्थिक वर्षभत्रै सात किमी सडकखण्ड कालोपत्र सम्पन्न गर्ने लक्ष्यका साथ काम अगाडि बढाइएको छ ।
विविध कारणले सडक कालोपत्रको काम ढिलाइ भएको बताउँदै सुवेदीले भने, ‘अब कालोपत्रको काम अगाडि बढ्छ । सडक कालोपत्रको परीक्षण भइसकेको छ । कालोपत्रको ट्रायल भइसक्यो, कालोपत्र सडकलाई छुवाइसक्यौ ।’
यस्तै जामुनेदेखि पोखरासम्मको पश्चिमखण्डको प्रगति न्यून रहेको मुग्लिन-पोखरा सडक योजना (पश्चिम खण्ड)का प्रमुख अमितकुमार श्रेष्ठले बताए । निर्माण कम्पनीका कारणका यो खण्डमा काम सुस्त रहेको र अब विस्तारै कामको गति बढ्ने श्रेष्ठले बताए ।
पूर्वी खण्डको कामका लागि विसं २०७७ माघ १७ गते सम्झौता भई २०७८ वैशाख २ गतेदेखि काम सुरु भएको थियो । ४१ दशमलव ४५ किमी यो खण्डमा तीन ठूला र चार साना पुल निर्माण गरिनेछन् । पूर्वी खण्डको ठेक्का चाइना कम्युनिकेशन कन्स्ट्रक्सनले पाएको छ । यो खण्डको म्याद विसं २०८१ वैशाखसम्म रहेको छ ।
पश्चिम खण्डअन्तर्गत जामुनदेखि पोखरासम्म विसं २०७८ जेठ २ गते सम्झौता भई विसं २०७८ भदौ १२ गतेदेखि काम सुरु भएको थियो । यो खण्ड निर्माणको जिम्मा चिनियाँ कम्पनी यनहुइ काइयुयान हाइवे एन्ड ब्रिज कन्सट्रक्सनले पाएको छ । यो खण्डको म्याद विसं २०८१ भदौसम्म रहेको छ।
विसं २०२६ मा रेखाङ्कन भएको सडकमा सवारीको चाप बढ्दै गएपछि एशियाली विकास बैंक (एडिबी)को ऋण सहयोगमा सडक चार लेनको बनाउन लागिएको हो । पूर्वी खण्डको ठेक्का रु छ अर्ब २१ करोड ३१ लाख १३ हजारमा र पश्चिम खण्डको ठेक्का रु सात अर्ब ४० करोड ४६ लाखमा लागेको छ ।
चार लेनको बन्दा सडक सीमा दुइतर्फी २५/२५ मिटर हुनेछ । बाक्लो बस्ती भएका स्थानमा ४१ मिटर चौडाइको सडक बन्नेछ । डिजाइनअनुसार तनहुँको दमौली र डुम्रे बजारमा ४१ मिटरको सडक बन्नेछ । दुलेगौंडादेखि खैरेनीटार बजारसम्म, कोत्रे बजार क्षेत्र र कास्कीको गगनगौंडादेखि पोखरासम्म सडकको चौडाइ ४६ मिटरको हुनेछ ।
