व्यासले बहुउद्देश्यीय भवन निर्माण कार्य अगाडि बढायो
भञ्ज्याङन्यूज
तनहुँको व्यास नगरपालिकाले नयाँ बहुउद्देश्यीय भवन निर्माणको कार्यलाई अगाडी बढाएको छ । पृथ्वीराजमार्ग र सफासडक क्षेत्रलाई मोहोडा बनाएर चार तल्लाको व्यवसायिक भवन निर्माण गर्ने भएको हो ।
नगरपालिकाको मातहातमा रहेको पुरानो भवनलाई भत्काएर उक्त ठाँउमा ३ रोपनी ३ आना १ पैसा र १ दामको क्षेत्रफलमा व्यवसायिक बहुउद्देश्यीय भवन निर्माण गर्न लागिएको योजना तथा सहरी विकास शाखा प्रमुख डा. राजु पौडेलले जानकारी दिए ।
नगर विकास कोष र व्यास नगरपालिकाको संयुक्त लगानीमा उक्त भवन निर्माण गर्न लागिएको उनले बताए । उनका अनुसार नगर विकास कोषबाट ७० प्रतिशत र नगरपालिकाको ३० प्रतिशत लगानी रहेन छ ।
नगरपालिकाले २० वर्षो लागि नगर विकास कोषबाट ७० प्रतिशत लगानी ऋण लिएको हो । योजना तथा सहरी विकास शाखा प्रमुख पौडेलका अनुसार भुइँ तत्लामा ११ वटा पसल कबल, २ वटा भर्याङ, १ शैचालय र ३ वटा प्रवेशद्वार रहने छ ।
पहिलो तल्लामा १२ वटा पसल कबल, २ वटा भर्याङ, १ श्ौचालय रहने छ भने दोस्रो तल्ला र तेस्रो तल्लामा खुल्ला भाग बनाई क्षेत्रफलको हिसाबले कार्यालय प्रयोजनलाई दिनेगरि निर्माण गरिने भएको छ । साथै उक्त भवनमा लिफट् र एस्कालेटरको पनि सुविधा राखिने पौडेलले बताए ।
नगरपालिकाको आयस्रोत वृद्धि गर्ने लक्ष्यसहित मनोरञ्जनका लागि कमर्सियल कम्प्लेक्ससहितको ३१ करोडको लगानीमा व्यवसायिक निर्माण गर्न लागिएको नगरप्रमुख वैकुण्ठ न्यौपानेले बताए ।
पुरानो भवन भत्काउनको लागि उक्त भवनमा रहेका शाखाहरु सारिएको छ । नगरप्रमुख न्यौपानेले पहिलो कार्यकालमा सम्पन्न गरेको बहुउद्देश्यीय भवनको माथिल्लो भागमा शाखाहरु सारिएको छ । पुरानो भवनमा रहेका शिक्षा तथा सामाजिक शाखा, स्वास्थ्य तथा जनंसख्या शाखा, पशु तथा कृषि शाखा र सरसफाई शाखा माथिल्लो भवनमा सार्न सुरु गरिएको स्वास्थ्य शाखा प्रमुख प्रमोद सोतीले जानकारी दिए ।
