गर्भवती महिलाको उद्धार
भञ्ज्याङ समाचारदाता/दुलेगौंडा
तनहुँको शुक्लागण्डकी नगरपालिकाले गर्भवती महिलाको उद्धार गरेर अस्पताल पुर्याएको छ । दुलेगौँडास्थित खैरेनीटार स्वास्थ्य चौकीमा सुत्केरी व्यथा लागेर आएकी कास्कीको मादी गाउँपालिका स्थायी घर भई हाल शुक्लागण्डकी-२, गाछेपानी बस्दै आएकी मिनकुमारी श्रेष्ठ उद्धार गरी पोखरा पठाइएको हो ।
स्वास्थ्य चौकीले पोखरा रिफर गरेपछि पोखरा जाने भाडा नभएकाले उनी अलपत्र परेकी थिइन् । उनका श्रीमान सुरेश सुदारले पोखरा जान पैसा नभएकाले पैसा सापटी माग्न गएको बताएका थिए । उनीहरु घरनिर्माण सम्बन्धी काम गर्दै आएका छन् ।
पत्रकार राजन उपाध्यायले गर्भवती महिला अलपत्र परेको अवस्थाबारे नगर उपप्रमुख खुमबहादुर वि.कलाई जानकारी गराएका थिए । लगत्तै नगरपालिकाले निःशुल्क रुपमा नगरको एम्बुलेन्स व्यवस्था गरेर पठाएको उपप्रमुख वि.क.ले जानकारी गराए ।
उनले भने ‘घट्नाबारे हामी कसैलाई थाहा भएन । राजन जी त्यहाँ पुग्नु भएको रहेछ । उहाँले जानकारी गराउनु भएलगत्तै एम्बुलेन्स पठाएका हौ’, उनले भने, ‘सुत्केरी पोषणभत्ता दिदै आएको बताउँदै वडाको सिफारिसको आधारमा गर्भवती तथा सुत्केरी महिलालाई निःशुल्क एम्बुलेन्सको व्यवस्था गराउँदै आएको छ ।’
