इलाज सम्बन्धी कसुरमा दमौलीका दुइ मेडिकल सञ्चालक पक्राउ
जिल्ला प्रहरी कार्यालय तनहुँले इलाज सम्बन्धी कसुरमा दमौलीका दुइ मेडिकल सञ्चालकलाई पक्राउ गरेको छ । अधिकार क्षेत्र बाहिर गई बिरामीलाई भर्ना गरी उपचार गरेको अभियोगमा प्रहरीले पक्राउ गरेको हो ।
पक्राउ पर्नेमा व्यास नगरपालिका-३ पराशर टोलस्थित प्रजुन थापा मेडिकल हल सञ्चालक ५२ वर्षीया विष्णु कुमारी गरौजा र अनसनचौतारास्थित मित्रता स्वास्थ्य क्लिनिकका सञ्चालक ४५ वर्षीय चन्द्रबहादुर चौधरी रहेको जिल्ला प्रहरी कार्यालय तनहुँले जनाएको छ ।
जिल्ला प्रशासन कार्यालय, व्यास नगरपालिका, स्वास्थ्य कार्यालय, दमौली अस्पताल, जिल्ला प्रहरी कार्यालय लगायतको अनुगमन टोलीले निजहरुलाई पक्राउ गरेको प्रहरी नायब उपरिक्षक मोहनबहादुर खाँणले जानकारी दिए ।
अनुगमनका क्रममा प्रजुन थापा मेडिकल हलले क्लिनिक दर्ता गरी फार्मेसीमा बिरामी जाँच गरेको र बिरामीलाई इन्जेक्सन मार्फत उपचार गराएको भेटिएको प्रहरीले जनाएको छ ।
यस्तै मित्रता स्वास्थ्य क्लिनिकमा डाक्टर नभएको आफै औषधी सिफारिस गरेको, डेंगु संक्रमित बिरामीलाई इन्जेक्सन, ट्याब्लेट र एन्टिव्योटिक्सको माध्यमबाट उपचार गराएको भेटिएपछि पक्राउ गरिएको तनहुँ प्रहरीले जनाएको छ ।
