नेपाली कांग्रेस तनहुँमा महाधिवेशन प्रतिनिधिका लागि १६ जनाको मनोनयन

नेपाली कांग्रेस तनहुँमा रिक्त रहेको तीन महाधिवेशन प्रतिनिधिका लागि १६ जनाले मनोनयन दर्ता गरेका छन् । तनहुँ क्षेत्र नम्बर १ को एक महाधिवेशन प्रतिनिधि (जनजाति) तर्फ छ र क्षेत्र नम्बर २ को दुइ महाधिवेशन प्रतिनिधि (प्रत्यक्ष खुला) तर्फ १० जनाले मनोनयन दर्ता गरेका हुन् ।

निर्वाचन समितिले महाधिवेशन प्रतिनिधिका लागि आइतबार मनोनयन दर्ताको कार्यतालिका सार्वजनिक गरेको थियो । महाधिवेशन प्रतिनिधि चयनपछि क्षेत्र नम्बर १ मा एक र क्षेत्र नम्बर २ मा दुइ महासमिति सदस्य चयनका लागि प्रक्रिया थालिने निर्वाचन अधिकृत चन्द्रकान्त वाग्लेले बताए ।

क्षेत्र नम्बर १ को एक महाधिवेशन प्रतिनिधि (जनजाति) तर्फ अशोक गुरुङ, राजकुमार श्रेष्ठ, प्रतापसिं गुरुङ, गलबहादुर गुरुङ, लेखबहादुर राना र बैंशबहादुर गुरुङले मनोनयन दर्ता गरेका छन् ।

यस्तै, क्षेत्र नम्बर २ को दुइ महाधिवेशन प्रतिनिधि -प्रत्यक्ष खुला) तर्फ कृष्णराज पण्डित, रविचन्द्र पौडेल, बालकृष्ण घिमिरे, विष्णुहरि पाठक, मोहन गिरी, सन्तोष घिमिरे, विष्णु मल्ल, वीरबहादुर थापा मगर, माधव भट्टराइ र श्रीराम आलेले मनोनयन दर्ता गराएका छन् ।

महाधिवेशन प्रतिनिधिको निर्वाचन कार्यतालिका अनुसार आइतबार नै दावी विरोध, दावी विरोध उपर छानबिन, दोस्रो उम्मेदवारको नामावली प्रकाशन हुनेछ । त्यस्तै मंसिर ५ गते उम्मेदवारी फिर्ता, सोही दिन अन्तिम नामावली प्रकाशन हुनेछ ।

सहमति नभएमा मंसिर ६ गते मतदान कार्यक्रम गर्ने कार्यतालिका रहेको छ । मतदान क्षेत्र नम्बर १ को लागि पार्टी कार्यालय र २ को बेलचौतारा सामुदायिक भवनमा गरिने भएको छ । निर्वाचन समितिले मंसिर १० गतेभित्र महाधिवेशन प्रतिनिधि र महासमिति सदस्य टुंगो लगाउने तयारी गरेको छ ।