दमौलीको बुल्दीपुलमा ट्याक्सी दुर्घटना हुँदा पैदल यात्री सहित छ घाइते
पृथ्वीराजमार्ग अन्तर्गत तनहुँको व्यास नगरपालिका-१ दमौली स्थित बुल्दीपुलमा ट्याक्सी दुर्घटना हुँदा पैदलयात्री सहित छ जना घाइते भएका छन् ।
डुम्रेबाट दमौलीतर्फ आउँदै गरेको ग१ज ३७३२ नम्बरको ट्याक्सी शनिबार दिउँसो दुर्घटना दुइ जना पैदलयात्री र चार जना ट्याक्सीमा सवार घाइते भएको जिल्ला प्रहरी कार्यालय तनहुँले जनाएको छ ।
ट्याक्सीको ठक्करबाट पैदलयात्री व्यास नगरपालिका-१ गल्वुवेशी बस्ने ८ वर्षीया नाहिशा गुरुङ र ४ वर्षीया निहा गुरुङ घाइते भएको प्रहरी नायब उपरिक्षक मोहनबहादुर खाँणले जानकारी दिए ।
पैदलयात्रीलाई ठक्कर दिँदा उक्त ट्याक्सी अनियन्त्रित भई सडकबाट अन्दाजी दुइ मिटर तल खसेको थियो ।
उक्त दुर्घटनामा ट्याक्सी चालक कास्कीको पोखरा महानगरपालिका-१० बस्ने ४० वर्षीय गौतम गुरुङ, ट्याक्सीमा सवार व्यास नगरपालिका-१ गल्वुवेशी बस्ने २८ वर्षीया सपना अधिकारी, पोखरा महानगरपालिका-१० बस्ने ५७ वर्षीया हेमकला राइ र ६४ वर्षीय विष्णुकुमारी गुरुङ घाइते भएका छन् ।
घाइतेमध्ये दुइ पैदलयात्रीको पोखरा गण्डकी मेडिकल कलेजमा उपचार भइरहेको छ । घाइते हेमकला र विष्णुकुमारीको मणिपाल शिक्षण अस्पतालमा उपचार भइरहेको छ । ट्याक्सी चालक गौतम र सपना अधिकारी डिस्चार्ज भएको प्रहरीले जनाएको छ ।
