ऋषिङ गाउँपालिका अन्गर्तगतका स्वास्थ्य संस्थाको निरीक्षण
ऋषिङ : तनहुँको ऋषिङ गाउँपालिकाका प्रमुख प्रशासकीय अधिकृत अनिल अंगाइको नेतृत्वमा एक कर्मचारी टोलीले गाउँपालिका अन्तर्गतका स्वास्थ्य संस्थाहरूको स्थलगत निरीक्षण गरेको छ । निरीक्षण टोलीले वडा नं. ६ मा रहेका जैसीहटिया आधारभूत स्वास्थ्य सेवा केन्द्र र ढुङ्गाडे स्वास्थ्य सेवा केन्द्रको अवस्था अवलोकन गरेको हो ।
स्वास्थ्य सेवा केन्द्रहरूको भौतिक पूर्वाधार, सेवा प्रवाहको गुणस्तर, जनशक्ति व्यवस्थापन, औषधि उपलब्धता लगायतका पक्षहरूमा प्रत्यक्ष जानकारी लिनका लागि निरीक्षण गरिएको प्रमुख प्रशासकीय अधिकृत अंगाइले बताए ।
“स्वास्थ्य सेवा जनताको आधारभूत अधिकार हो । त्यसको गुणस्तर र पहुँचमा सुधार गर्न स्थानीय सरकारको भूमिकासमेत अत्यन्त महत्त्वपूर्ण हुन्छ”, उनले भने ।
निरीक्षणबाट प्राप्त सुझाव र अवलोकनका आधारमा आवश्यक नीति तथा कार्ययोजना बनाइने तथा सुधारात्मक कदम चालिने टोलीले जनाएको छ ।
गाउँपालिकाका कुशल प्रशासकको रूपमा परिचित अंगाइले कार्यभार सम्हालेदेखि नै विभिन्न रचनात्मक तथा सेवामूलक कार्यहरू अगाडि बढाउँदै आएका छन् ।
जनमैत्री सेवा प्रवाहलाई प्राथमिकतामा राख्दै आएका उनले यसपटक स्वास्थ्य क्षेत्र सुधारतर्फ ध्यान केन्द्रित गरेका छन् ।
निरीक्षण टोलीमा स्वास्थ्य शाखाका प्रतिनिधिहरू, प्राविधिक कर्मचारी तथा स्थानीय सरोकारवालाहरूको समेत सहभागिता रहेको थियो ।
