बुद्धसिंह मार्गमा नाला निर्माण शुरु

पृथ्वीराजमार्गको वैकल्पिक सडकको रूपमा विकास गर्न लागिएको बुद्धसिंह मार्गमा कालोपत्रका लागि नाला निर्माणको काम थालिएको छ । उक्त खण्डको दश किलोमिटर सडक कालोपत्र हुने जनाइएको छ । गण्डकी प्रदेश सरकारका भौतिक पूर्वाधार तथा यातायात व्यवस्थामन्त्री रेशमबहादुर जुग्जालीले गत कात्तिकमा उक्त सडकको निरीक्षण गरेपश्चात् निर्माण कम्पनीले काम सुरु गरेको हो ।

सदरमुकाम दमौलीदेखि घुमाउने जोड्ने बुद्धसिंह मार्गको व्यास नगरपालिका-१३ सोढेंँसम्म दश किलोमिटर खण्ड आक्सफाल्ट प्रविधिबाट कालोपत्र गरिनेछ । कूल ३२ किलोमिटर दूरीमध्ये चालु आर्थिक वर्षमा दश किलोमिटर कालोपत्रका लागि बजेट विनियोजन भएको पूर्वाधार विकास कार्यालयका प्रमुख श्रीकृष्ण आचार्यले जानकारी दिनुभयो । सडक कालोपत्रका लागि भ्याटसहित रु ३४ करोड २७ लाख ४५ हजार पाँच सय ६१ मा मैनाचुली/सफल जेभी काठमाडौँले ठेक्का सम्झौता गरी काम सुरु गरेको छ ।

विसं २०७९ भदौ २७ गते सम्झौता गरी विसं २०८२ जेठ ३० गतेसम्म काम सम्पन्न गर्नुपर्ने म्याद रहेको छ । सम्झौता बमोजिम आक्सफाल्ट प्रविधिको कालोपत्र, पक्की नाला, कटिङ र कल्भर्ट निर्माण गरिनेछ । आगामी असार मसान्तसम्म पक्की नाला निर्माण सम्पन्न हुने निर्माण कम्पनीका प्रतिनिधिका विष्णुराज तिवारीले जानकारी दिनुभयो । उहाँले भन्नुभयो, “पक्की नाला निर्माणका लागि अभाव नभएको हुँदा धमाधम काम भइरहेको छ । नाला सकिएछि कालोपत्रको काम सुरु हुनेछ ।”

गण्डकी प्रदेश सरकारले यो मार्गलाई प्राथमिकतामा राखेको छ । दमौलीदेखि चितवनको घुमाउने निस्किने बुद्धसिंह मार्गलाई पृथ्वीराजमार्गको वैकल्पिक मार्गको रूपमा विकास गर्न लागिएको छ । पृथ्वीराजमार्ग अन्तर्गत डुम्रे आँबुखैरेनी हुँदै घुमाउने पुग्न भन्दा बुद्धसिंह मार्गबाट जाँदा २५ किलोमिटर दूरी कम पर्दछ ।

गण्डकी प्रदेश सरकारले बुद्धसिं मार्गलाई प्राथमिकतामा राखेर यो वर्षका लागि रु पाँच करोड बजेट विनियोजन गरेको छ । चितवनको घुमाउनेमा पक्की पुल नहुँदा दमौलीबाट गएका सवारीसाधन पार गर्न मिल्दैन ।

घुमाउनेमा पुल निर्माणमा ढिलाइ भएकाले पनि भए वैकल्पिक मार्गको रूपमा प्रयोग गर्न सकिएको छैन । गत हप्ताबाट मात्रै घुमाउनेमा पनि पुल निर्माणको काम सुरु भइसकेको छ । तनहुँको आँबुखैरेनी गाउँपालिका-५ र भरतपुर महानगरपालिका-१ जोड्ने गरी त्रिशूली नदीमा निर्माण सुरु भएर अलपत्र बनेको पुलको काम पुनः सुरु भएको हो । पुल निर्माणको ठेक्का पाएको मृत सञ्जीवनी कन्स्ट्रक्सनका प्रतिनिधि सुवास उप्रेतीले छिटो काम सम्पन्न गर्ने कामलाई गति दिइएको जानकारी दिनुभयो ।

विसं २०७१ असारमा पुल निर्माणका लागि सम्झौता भएको थियो । मृत सञ्जीवनी निर्माण कम्पनीसँग भएको सम्झौता अनुसार हालसम्म ३० प्रतिशत मात्रै काम भएको छ । एक सय पाँच मिटर लम्बाई रहेको पुलको लागत रु नौ करोड ५६ लाख रहेको छ ।

उक्त पुलको निर्माण सम्पन्न पश्चात पोखरा र दमौलीलाई नारायणगढ आउनजान हाल सञ्चालन भइरहेको मुग्लिङ-नारायणगढ सडक भन्दा २५ किलोमिटरको दूरी छोटो पर्छ । घुमाउनेमा मोटरेवल पुल नहुँदा यातायातका साधन तनहुँकै सिमानामा पुगेर फर्कन बाध्य छन्। मोटरसाइकल भने डोहोर्‍याएर मुग्लिङ-नारायणगढ सडक खण्डसम्म ल्याउन सकिन्छ ।

सेयर गर्नुहोस्

प्रतिक्रिया दिनुहोस्

सम्बन्धित खवर