त्रिभवन आर्मीका कार्कीले जिते तेश्रो ऋषिङ अल्ट्रा म्याराथनको उपाधि
भञ्ज्याङन्यूज
तनहुँको ऋषिङ गाउँपालिकाले आयोजना गरेको तेश्रो ऋषिङ अल्ट्रा म्याराथन-२०८० को उपाधी त्रिभवन आर्मीका गोविन्द कार्कीले जितेका छन् । ४२.२ किलोमिटर दुरीको अल्ट्रा म्याराथन २ घण्टा ५९ मिनेट ४० सेकेण्डमा पुरा गर्दै कार्कीले उपाधी आफ्नो कब्जामा पारेका हुन् ।
ऋषिङ गाउँपालिका-५ धारुङ भञ्ज्याङदेखि ऋषिङ गाउँपालिका-३ दुबुङकोटसम्मको ४२.२ किमी दूरी ३ घण्टा ४६ सेकेण्डमा पुरा गर्दै त्रिभुवन आर्मी क्लवकै गोपाल तामाङ द्धितीय भएका छन् भने त्रिभवन आर्मी क्लवकै तिलक बहादुर सुनुवारले उक्त दुरी ३ घण्टा ३ मिनेट १२ सेकेण्डमा पार गर्दै तृतीय भएका छन् ।
यस्तै, उक्त दुरी काठमाडौंका करण रावलले ३ घण्टा ८ मिनेट २९ सेकेण्ड, बैतडीका मोहनदेव जोशीले ३ घण्टा ९ मिनेट २१ सेकेण्ड, त्रिभुवन आर्मी क्लवका जुनेस खड्काले ३ खण्डा ९ मिनेट ३४ सेकेण्ड र एपीएफका निरोज भट्टले ३ घण्टा ५४ मिनेड ३९ सेकेण्डमा पुरा गरी सान्त्वना स्थान प्राप्त गरेका छन् ।
उक्त म्याराथन प्रतियोगितका प्रथमलाई ६५ हजार रुपैयाँ, द्वितीयलाई ४० हजार रुपैयाँ, तृतीयलाई २५ हजार रुपैयाँ नगद पुरस्कार प्रदान गरिएको ऋषिङ गाउँपालिकाका प्रवक्ता विजय दरैले जानकारी दिए ।
५७ जना धावकको सहभाष्तिा रहेको प्रतियोगितामा सान्त्वना स्थान प्राप्त गर्नेहरुलाई जनही १० हजार रुपैयाँ पुरस्कार प्रदान गरिएको छ । गाउँपालिकाले राष्ट्रिय एकता दिवस पुस २७ गतेका दिन अल्ट्रा म्याराथन प्रतियोगिता गर्दै आएको छ ।
गाउँपालिकाको धारुङ भञ्ज्याङदेखि सुरु भई ऋषिङ प्रवेशद्वार, रानीपोखरी, गाउँपालिका-७ को कार्यालय, अर्खलाछाप, काफलडाँडा, पुरानो ऋषिङ (चालिसे) पोखरीभञ्ज्याङ, गोठादी, ढुङ्गाडे, भिरकोट अर्चल्दी, मौरीबास, दाङसिरी हुँदै दुबुङकोट भ्यू टावरसम्म म्याराथन प्रतियोगिताको दुरी कायम गरिएको छ ।
खेलमार्फत ऐतिहासिक एवं पर्यटकीय हिसाबले अत्यन्तै महत्वपूर्ण स्थान भएकाले पर्यटकीय स्थलको प्रचारप्रसार गर्ने उद्देश्यसहित अल्ट्रा म्याराथन प्रतियोगिता सञ्चालन गरिएको गाउँपालिकाका अध्यक्ष राजेन्द्रकृष्ण श्रेष्ठले बताए ।
