नेपाल पब्लिक क्याम्पस संघ तनहुँको अध्यक्षमा केसी

सामुदायिक क्याम्पसको छाता संगठन नेपाल पब्लिक क्याम्पस संघ तनहुँको पाँचौँ अधिवेशनले ऋषि केसीको अध्यक्षतामा सात सदस्यीय नयाँ कार्य समिति चयन गरेको छ ।

व्यास नगरपालिका-१ विज्ञानचौर भादगाउँस्थित आदिकवि भानुभक्त क्याम्पसमा भएको अधिवेशनबाट आँबुखैरेनी बहुमुखी क्याम्पसका सञ्चालक समिति अध्यक्ष केसी संघको अध्यक्ष पदमा चयन भएका हुन् । संघको उपाध्यक्षमा सिके विके क्याम्पस बन्दीपुर-१ डुम्रेका अध्यक्ष सुन्दरलाल श्रेष्ठ, सचिवमा आदिकवि भानुभक्त क्याम्पसका प्राध्यापक संघका उपाध्यक्ष चिरञ्जीवी बस्नेत र कोषाध्यक्षमा त्रिभुवन क्याम्पस भानु नगरपालिका-११ मानेचौका क्याम्पस प्रमुख रवीन्द्र जोशी चयन भएका छन् ।

यस्तै सदस्यमा तनहुँ शारदा क्याम्पसका अध्यक्ष सीताराम अधिकारी, बन्दीपुर-१ का क्याम्पसका नेपाल पब्लिक क्याम्पस प्राध्यापक संघका एकाइ अध्यक्ष गोवर्धन भट्टराइ, शुक्लागण्डकी नगरपालिका-८ स्थित सहिद कृष्ण क्याम्पसका क्याम्पस प्रमुख हरिप्रसाद लम्साल रहेका छन् ।

सो अवसरमा आदिकवि भानुभक्त क्याम्पसका प्रमुख एवं संघका गण्डकी प्रदेश समितिका निवर्तमान अध्यक्ष महाप्रसाद हड्खलेले सामुदायिक क्याम्पसका चुनौती, अवसर र संघीय, प्रादेशिक र स्थानीय सरकारसँग जनस्तरबाट सञ्चालन हुँदै आएका जिल्लाका सामुदायिक क्याम्पसको अपेक्षाका बारेमा जानकारी गराएका थिए ।

अधिवेशनले सामुदायिक क्याम्पसको सञ्चालन, भौतिक पूर्वाधार निर्माण र त्यहाँ कार्यरत प्राध्यापक, कर्मचारीको सेवा सुविधाको प्रत्याभूति गर्न र उनीहरूको योग्यता, ज्ञान, सीप र क्षमता अभिवृद्धिको अवसर प्रदान गर्ने गरी नीति, कार्यक्रम तथा योजना तय गर्न सहज बनाउनेछ।

संघले संघीय, प्रादेशिक एवं स्थानीय सरकारलाई आहृवान गर्ने र सामुदायिक क्याम्पसलाई उच्च शिक्षाका थप प्राविधिक एवं रोजगारमूलक शैक्षिक कार्यक्रम सञ्चालनको अनुमति प्रदान गर्न र सामुदायिक क्याम्पसलाई आर्थिक एवं भौतिक टेवा प्रदान गर्ने कार्यक्रम सञ्चालन गर्न विश्वविद्यालय अनुदान आयोग, त्रिभुवन विश्वविद्यालय र प्रदेश विश्वविद्यालयलाई आहृवान गर्ने प्रस्ताव पारित गरेको छ ।

अधिवेशनमा जिल्लाका सामुदायिक क्याम्पसका प्रतिनिधिको सहभागिता रहेको थियो । तनहुँमा १० वटा सामुदायिक क्याम्पस सञ्चालनमा रहेका छन् । निर्वाचन प्रबन्ध समिति संयोजकमा नेपाल पब्लिक क्याम्पस संघका केन्द्रीय सदस्य एवं जनज्योति क्याम्पस भिमादका क्याम्पस प्रमुख केशवराज काफ्ले र सदस्यमा आदिकवि भानुभक्त क्याम्पसका सहायक क्याम्पस प्रमुख डा रामकुमार अधिकारी र नेपाल पब्लिक क्याम्पस प्राध्यापक संघ गण्डकीका अध्यक्ष एवं आदिकवि भानुभक्त क्याम्पस मानविकी तथा समाजशास्त्र विभागका प्रमुख विमल गिरी रहेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर