क्रिकेट संघ तनहुँको साधारणसभा
जिल्ला क्रिकेट संघ तनहुँ (क्यान)ले आइतबार साधारणसभा सम्पन्न गरेको छ । संघ तनहुँका अध्यक्ष मदन तिमिल्सेनाको अध्यक्षतामा आयोजित कार्यक्रममा बोल्दै जिल्ला खेलकुद विकास समिति तनहुँका अध्यक्ष अनिल पाण्डेले तनहुँमा क्रिकेटले निकै राम्रो गरिरहेको र नेपालमा क्रिकेटको क्रेज बढ्दै गएको बताए ।
अध्यक्ष पाण्डेले जिल्ला क्रिकेट संघ तनहुँले महिला खेलाडीहरु उत्पादनमा जोड दिनुपर्ने र खेल क्षेत्रको विकासका लागि सबै सरोकारवाला पक्ष एक भएर अगाडि बढ्न जोड दिए ।
कार्यक्रममा क्रिकेट संघका केन्द्रीय सदस्य सुदिप शर्माले क्रिकेटले विश्वमा नेपालको नाम चिनाउने काम गरेको र क्रिकेट खेल्ने खेलाडीहरुको पनि भविष्य रहेको बताए ।
प्रादेशिक क्रिकेट संघ गण्डकी प्रदेशका उपाध्यक्ष प्रकाश पौडेलले पछिल्लो समयमा तनहुँले क्रिकेटको विकासमा उल्लेख्य काम गरेको बताउँदै गत आर्थिक बर्षमा संचालन गरेको स्कुल लिग खेलले राम्रो संदेश दिएको चर्चा गरे ।
कार्यक्रममा दमौली अस्पतालका पुर्व अध्यक्ष हरिराज कडेल, क्यान तनहुँका निवर्तमान अध्यक्ष ताराराम श्रेष्ठ, जिल्ला खेलकुद विकास समिति तनहुँका कार्यालय प्रमुख शिवहरी पण्डित लगायतले आ–आफ्ना विचार व्यक्त गरेका थिए ।
उक्त कार्यक्रममा संघ तनहुँका अध्यक्ष तिमल्सेनाले बर्षिक प्रतिवेदन, आर्थिक प्रतिवेदन र भावि योजना प्रस्तुत गरेका थिए ।
