भानु नगर स्तरीय खेलकुद प्रतियोगितामा वडा नं. ३ र ७ च्याम्पियन
भानु : भानु नगरस्तरीय खेलकुद विकास समितिले आयोजना गरेको तेस्रो मेयर–उपमेयर कप खेलकुद प्रतियोगितामा वडा नं. ३ र ७ च्याम्पियन बनेका छन् । प्रतियोगिताका फुटबलतर्फ १३ तथा भलिबलतर्फ ११ वडाको सहभागिता रहेको थियो । फुटबलतर्फ वडा नं. ३ ले उपाधि जित्दै वडा नं. २ लाई उपविजेतामा सीमित बनायो ।
प्रतियोगितामा विशाल नेपाली (भानु–२) सर्वोत्कृष्ट खेलाडी घोषित भए भने सुजन बस्नेत (भानु–१) सर्वाधिक गोलकर्ता र सरोज तामाङ (भानु–३) उत्कृष्ट गोलकिपर घोषित भए। भलिबलतर्फ वडा नं. ७ विजेता र वडा नं. ८ उपविजेता बने। विजेता टोलीका सागर श्रेष्ठ सर्वोत्कृष्ट खेलाडी तथा किस्मत श्रेष्ठ उत्कृष्ट स्पाइकर घोषित भए । पुरस्कारतर्फ फुटबल विजेताले करसहित ९४ हजार रुपैयाँ, शिल्ड, ट्रफी, मेडल र प्रमाणपत्र प्राप्त गरे भने उपविजेताले ५४ हजार रुपैयाँसहित ट्रफी, मेडल र प्रमाणपत्र प्राप्त गरे। भलिबल विजेताले करसहित २७ हजार रुपैयाँ र उपविजेताले २० हजार रुपैयाँ नगदसहित ट्रफी र प्रमाणपत्र प्राप्त गरेका छन्।
साथै, सर्वोत्कृष्ट खेलाडी, सर्वाधिक गोलकर्ता तथा उत्कृष्ट स्पाइकरलाई जनही करसहित ४ हजार १०० रुपैयाँ नगद र ट्रफीसहित सम्मान गरिएको आयोजकले जनाएको छ। पुरस्कार रकममा २५ प्रतिशत कर समावेश गरिएको छ।
