देवघाटमा बाँदर आतंक : ९२ वर्षीया वृद्धा गम्भिर घाइते
देवघाट : तनहुँको देवघाटधाम क्षेत्रमा बाँदरले आतंक मचाउने गरेको छ। यहाँका बाँदरले दिनहुँ मानिसलाई आक्रमण गरी घाइते बनाउने गरेका छन् । वर्षौदेखि बाँदर आतंक झेल्दै आएका देवघाटवासीहरूले बाँदर आतंक रोक्ने अनेक प्रयास गरेपनि सफल हुन सकेका छैनन् ।
बाँदरले देवघाटका बासिन्दा तथा अन्यत्रबाट आउने धार्मिक पर्यटकहरुलाई आक्रमण गरी घाइते बनाउने गरेको छ । विहीबार पनि देवघाट टाउनचोक निवासी ९२ बर्षीया पवित्रा पौडेललाई घरको आँगनमै बसिरहेको समयमा आक्रमण गरी गम्भिर घाइते बनाएको छ । सदाजस्तै आफ्नो घर अगाडि बसिरहेको बेला स–साना बाँदरका बच्चाहरूसँगै ठुलो साँढे बाँदर पनि कराइरहेका थिए। सधै लौराले धपाएर भाग्ने बाँदरले आज सिधै बृद्धाआमा माथि जाइलागेको स्थानीयले बताएका छन् । बाँदरले ढाडमाथि बसि कोपर्ने, चिथोदै टोकेर गम्भिर घाइते बनाएको प्रत्यक्ष दर्शिले बताए ।
बिहानदेखि साँझासम्म बाँदरले कतैबाट आएर चिथोर्ने, कोपर्ने र टोक्ने पो हो कि भनि चिन्ता र डरैडरमा हिड्नुपर्ने बाध्यता रहेको स्थानीय रक्षा कार्कीले बताइन । उनले भनिन, ‘अब त बाँटो हिड्दा जो कोहिले एउटा लामो लौरो सहायता लिएर हिड्नुपर्ने बाध्यता आएको छ । लौरो नलिए बाँदरको आक्रमणबाट बाँच्नै गाह्रो हुने अवस्था भएको छ ।’
स्थानीय हरिलाल सापकोटाले बाँदरले बृद्धाआमाको ढाडमा हड्डि निस्कने गरी टोकेको देख्ने बित्तिकै आफू घरबाट छिटोछिटो गई लौराले बाँदरलाई हानि धपाएको बताए । घाइते वृद्धाको देवघाटमै प्राथमिक उपचार गरी थप उपचारका लागि भरतपुर लग्ने तयारी गरिएको उनले बताए । देवघाटको मुख्य समस्याको रूपमा देखिएको बाँदर आतंक रोक्नका लागि स्थानीय सरकारले छिटोभन्दा छिटो समाधान खोज्नुपर्ने स्थानीय उमेश नैनावर्तीले बताए ।
बाँदरको टोकाइबाट हरेक दिन देवघाटमा बृद्धवृद्धा र युवाहरू घाँइते बन्ने गरेका छन् । स्थानीय मात्रै नभई देवघाट पूजाअर्चना गर्न आउने तिर्थालु भक्तजन, घुम्न आउने पर्यटकलाई पनि बाँदरले आक्रमण गरेर घाँइते बनाउने गरेको छ । उनिहरूले ल्याउने गरेको फूलप्रसाद तथा झोला समेत बाँदरले खोसेर दुःख दिने गरेको छ । देवघाटमा बाँदर आतंक रोक्न समिति गठन गरिएपनि समितिले प्रभावकारी रुपमा काम गर्न नसकेको स्थानीयको गुनासो छ ।
