राष्ट्रिय दलित पत्रकार संघ नेपाल गण्डकी प्रदेशको अध्यक्षमा तनहुँका पूर्ण
बन्दीपुर : राष्ट्रिय दलित पत्रकार संघ नेपाल गण्डकी प्रदेशको प्रथम अधिवेशनबाट तनहुँका पूर्ण बिकको अध्यक्षतामा नयाँ नेतृत्व चयन गरिएको छ । शनिबार तनहुँको बन्दीपुरमा सम्पन्न अधिवेशनले १५ सदस्यीय कार्यसमिति चयन गरेको हो ।
कार्यसमितिको उपाध्यक्षमा सन्तोष परियार (कास्की), महिला उपाध्यक्ष लक्ष्मी सुनार (गोरखा), सचिव रामशरण नेपाली (कास्की), कोषाध्यक्ष टोप बहादुर बिक(कास्की) र सहसचिवमा अर्जुन हिताङ्ग (पर्वत) चयन भएका छन् ।
सदस्यहरुमा लक्ष्मण बिक (पर्वत), पूर्णिमा परियार (स्याङ्जा), श्याम शितल परियार (लमजुङ), अमृत बिक (गोरखा), किरण गोतामे (नवलपुर), विमला परियार (म्याग्दी), आदित्य रसाइली (मुस्ताङ) र सरस्वती ल्वागुन (मुस्ताङ) रहेका छन् ।
शनिबार गण्डकी प्रदेशका सभामुख कृष्ण धितालले अधिवेशनको उद्घाटन गर्दै समाजमा ब्यप्त सांस्कृतिक असमानता चिर्न पत्रकारले सशक्त भूमिका खेल्नुपर्ने बताएका छन् । उनले सांस्कृतिक रुपमा देखिएको असमानताले सबैभन्दा बढी दलित समुदाय पीडित रहेको भन्दै पत्रकारले पीडितको पक्षमा कलम चलाउनुपर्ने बताए ।
कार्यक्रममा बन्दीपुर गाउँपालिकाका अध्यक्ष सुरेन्द्रबहादुर थापा, पत्रकार महासंघ गण्डकी प्रदेशका अध्यक्ष रमेश पौडेल, पत्रकार महासंघ तनहुँका अध्यक्ष डिपी अधिकारी लगायतले आ–आफ्ना विचार व्यक्त गरेका थिए ।
