रेडियो दिवसमा परोपकार ज्येष्ठ नागरिक आश्रममा रेडियो वितरण
दमौली : विश्व रेडियो दिवसका अवसरमा दमौलीस्थित परोपकार ज्येष्ठ नागरिक आश्रममा रेडियो वितरण गरिएको छ । रेडियोको महत्व र सान्दर्भिकता अझैपनि उत्तिकै रहेको भन्दै सामुदायिक रेडियो प्रसारक संघ (अकोराब) गण्डकी प्रदेशले बिहीबार व्यास नगरपालिका–५ को उक्त आश्रमलाई रेडियो वितरण गरेको हो ।
सूचना र प्रविधिको विकाससँगै रेडियोको प्रभाव घटेको जस्तो देखिएपनि सहज रुपमा सूचना र समाचारको भरपर्दो स्रोतको रुपमा रेडियो रहेको समुदायिक रेडियो प्रसारक संघका केन्द्रीय सदस्य नवीनराज पौडेलले बताए । उनले रेडियो सूचना र समाचारको भरपर्दो र सशक्त माध्यम रहेको बताए ।
नेपाल पत्रकार महासंघका निवर्तमान केन्द्रीय सदस्य प्रदीप काफ्लेले रेडियोमा समय सापेक्ष विषयवस्तुलाई समावेश गर्नुपर्ने आवश्यकता रहेको बताए ।
सो अवसरमा प्रसारक संघले आश्रमलाई दुई वटा रेडियो वितरण गरेको छ । संघका गण्डकी प्रदेश अध्यक्ष ओमकार आचार्यले आश्रममा रहेका वृद्धवृद्धाहरुलाई सहज रुपमा सूचनाको पहुँचमा ल्याउन रेडियो वितरण गरिएको बताए ।
आश्रमका अध्यक्ष तारानाथ घिमिरेले सहयोगी दाताको सहयोगमा आश्रम सञ्चालन भइरहेको जानकारी गराउँदै रेडियोका माध्यमबाट यहाँका वृद्धवृद्धाले नयाँ नयाँ कुरा सिक्ने अवसर पाउने बताए ।
