कोदालो प्रहारबाट आफ्नै बुवा सहित दुई जनाको हत्या
नवलपरासी । पश्चिम नवलपरासीको सुनवल नगरपालिका २ अवरैयामा एक युवकले कोदालो प्रहार गरी आफ्नै बुवा सहित २ जनाको हत्या गरेका छन् ।
जिल्ला प्रहरी कार्यालय पश्चिम नवलपरासीका प्रहरी नायव उपरीक्षक वीरदत्त पन्तका अनुसार २७ वर्षीय हेमराज थारुले शुक्रबार विहान साढे १० बजेतिर आफ्नै बुबा ५० वर्षीय जयाराम थारु र ७० वर्षीय छिमेकी नाथु धरिकारलाई कोदालोले प्रहार गरी हत्या गरेका हुन् ।
हत्यामा सम्लग्न हेमराज थारु र उनले हत्यामा प्रयोग गरेको हतियार कोदालो घटना स्थलबाट प्रहरीले नियन्त्रणलाई लिएको छ । अहिले घटना स्थलमा प्रहरीले मुचुल्का बनाउने काम भईरहेको प्रहरी नायव उपरीक्षक पन्तले जानकारी दिए ।
प्रहरीका अनुसार हेमराजले बुबा जयाराम थारुको घाँटीमा कोदालो प्रहार गर्दा घटनास्थलमै मृत्यु भएको थियो। त्यसपछि उनले छिमेकी नाथु धरिकारलाई पनि टाउको र घाँटीमा प्रहार गरेका थिए।
घटनाको जानकारी पाउने बित्तिकै इलाका प्रहरी कार्यालय सुनवलबाट प्रहरी निरीक्षक सन्तोष पौडेलको नेतृत्वमा ७ जनाको टोली र जिल्ला प्रहरी कार्यालय नवलपरासीबाट प्रहरी उपरीक्षक अनुपम श्रेष्ठको कमाण्डमा २९ जनाको टोली घटनास्थलमा खटिएको छ ।
घटनाको अनुसन्धान भईरहेको र हत्या कारण खुल्न नसकेको प्रहरीले जनाएको छ ।
