दुलेगौंडाको हेल्थपोष्ट चोकमा भाँसिएको सडक तत्काल मर्मत गर्न नगरप्रमुखको निर्देशन
दुलेगौंडा : तनहुँको शुक्लागण्डकी नगरपालिकाको दुलेगौँडाबाट लामागाउँ जोड्ने मोटरमार्गको एक खण्ड वर्षाका कारण भाँसिएको छ। विश्व बैंकको ऋण सहयोग र नेपाल सरकारको अनुदानमा सञ्चालित सहरी शासन र पूर्वाधार परियोजना अन्तर्गत निर्माण भइरहेको उक्त सडक दुलेगौँडाको हेल्थपोष्ट चोक नजिकै भासिएर पहिरो खसेको हो ।
आइतबार रातीको वर्षापछि सडकमा समस्या देखिएपछि शुक्लागण्डकी नगरपालिकाका प्रमुख कृष्णराज पण्डितले सोमबारै निर्माण कम्पनीका प्रतिनिधिलाई कार्यालयमा बोलाएर तत्काल मर्मत कार्य सुरु गर्न निर्देशन दिएका छन् । उनले यसअघि नै सडक निर्माणको गुणस्तर र कमजोरीबारे निर्माण पक्षलाई सचेत गराइएको बताउँदै अब ढिलासुस्ती नगरी काम अघि बढाउन आग्रह गरे ।
निर्माण कम्पनी बानियाँ कन्ट्रक्सन सेवाका सम्पर्क अधिकारी श्यामानन्द गुप्ताले क्षतिको बारेमा पूर्ण जानकारी रहेको भन्दै तत्काल मर्मत कार्य सुरु गर्ने आश्वासन दिए । उनले भौगोलिक संरचना कमजोर भएकाले काम अघि बढाउँदा जोखिम हुने परिस्थिति छ भन्दै यसअघि नै सडकको बीमा गरिएको जानकारी दिए । बीमा कम्पनीले स्थलगत निरीक्षण गरी क्षतिको मूल्याङ्कन गरेपछि औपचारिक रुपमा काम थालिने बताइएको छ ।
सात दशमलव एक किलोमिटर लामो यो सडक खण्ड कालोपत्र गर्न बानियाँ निर्माण सेवासँग करिब २७ करोड ३५ लाख रुपैयाँमा ठेक्का सम्झौता भएको थियो । ठेक्का सम्झौता अनुसार यही साता काम सम्पन्न हुनुपर्ने भए पनि अहिलेसम्म जम्मा ५० प्रतिशत मात्र प्रगति भएको शुक्लागण्डकी नगरपालिकाका पूर्वाधार विकास शाखा प्रमुख तारापति भट्टराईले जानकारी दिए ।
उनका अनुसार अब निर्माण कम्पनीलाई थप दुई महिना म्याद बढाउने तयारी भइरहेको छ । नगरवासी भने निर्माणमा ढिलाइ र गुणस्तरप्रतिको प्रश्न उठाउँदै आएका छन् । सडक निर्माण सम्पन्न नहुँदा आवागमनमा असुविधा भईरहेको भन्दै उनीहरूले तोकिएको समयमै मर्मत र निर्माण सम्पन्न गर्न नगरपालिकालाई दबाब दिइरहेका छन् ।
