तिहारमा तनहुँका विभिन्न स्थानमा ८ सवारी दुर्घटनामा दुई दर्जनभन्दा बढी घाइते
तनहुँ जिल्लाका विभिन्न स्थानमा विहीवार दिनभर सवारी दुर्घटनाका श्रृंखलाबद्ध घटनाहरू भएका छन् । दिनभरका यी दुर्घटनामा दुई दर्जनभन्दा बढी व्यक्ति घाइते भएका छन् । केहीको अवस्था मध्यम रहेको प्रहरीले जनाएको छ ।
डुम्रेमा मोटरसाइकल दुर्घटना
बिहान करिब ६:४५ बजेको समयमा व्यास नगरपालिका–१२ छिर्कनस्थित पृथ्वीराजमार्गमा डुम्रेबाट दमौलीतर्फ जाँदै गरेको ग ५ प ७९०७ नम्बरको मोटरसाइकल सडकको डिभाइडरमा ठोक्किँदा दुर्घटना भएको हो । दुर्घटनामा आँबुखैरेनी गाउँपालिका–४ का ३३ वर्षीय आशिष गुरुङ घाइते भएका छन् । उनको बाँया खुट्टामा चोट लागेको छ र अवस्थामध्यम रहेको प्रहरीले जनाएको छ ।
बेलचौतारामा दुई मोटरसाइकल ठोक्किँदा दुई घाइते
बिहान करिब १०:३० बजे शुक्लागण्डकी नगरपालिका–५ बेलचौतारास्थित पृथ्वीराजमार्गमा बा.प्र.०२–०५७ प २६९२ र ग ९ प ७९१८ नम्बरका दुई मोटरसाइकल ठोक्किँदा चालक सुनिल श्रेष्ठ र पछाडि सवार कमल श्रेष्ठ घाइते भएका छन् । दुवैको हातमा चोट लागेको र अवस्था मध्यम रहेको बताइएको छ ।
थर्पुमा बस दुर्घटना, १२ जना घाइते
म्याग्दे गाउँपालिका–१ गुणादीमा बिहान १०:५० बजे थर्पुबाट दमौलीतर्फ जाँदै गरेको ग १ ख ९३०१ नम्बरको यात्रुबाहक बस सडकको डिभाइडरमा ठोक्किँदा १२ जना घाइते भएका छन् ।
घाइतेमध्ये रमेश आचार्य, रनबहादुर थापा, पशुपतीनाथ घिमिरे, नरबहादुर माकिमलगायतका यात्रुहरूको अवस्था मध्यम रहेको छ । उनीहरूलाई प्रदेश अस्पताल दमौलीमा उपचारका लागि पठाइएको छ ।
आँबुखैरेनीमा दुई छुट्टाछुट्टै स्कुटर दुर्घटना
आँबुखैरेनी गाउँपालिका–१ बरादीमा साँझ ५ बजे स्कुटर (ग.२१ प.३०७६) पोलमा ठोक्किँदा चालक राजकुमार दराई र सुकमाया दराई घाइते भएका छन् । दुबैको अवस्था मध्यम रहेको र थप उपचारका लागि भरतपुर रिफर गरिएको प्रहरीले जनाएको छ ।
त्यस्तै साँझ ६:३० बजे आँबुखैरेनी गाउँपालिका–१ एक्लेफाँटमा मोटरसाइकलले पैदलयात्री प्रेम परियारलाई ठक्कर दिँदा घाइते भएका छन् । उनलाई पनि थप उपचारका लागि भरतपुरस्थित सीएमसी अस्पताल लगिएको हो ।
दुलेगौंडामा कारले पैदलयात्री ठक्कर
साँझ ६:५० बजे शुक्लागण्डकी नगरपालिका–४ दुलेगौंडास्थित पृथ्वीराजमार्गमा पोखरातर्फ जाँदै गरेको ग २ च ७९७१ नम्बरको कारले बाटो क्रस गर्ने क्रममा पैदलयात्री अप्सरा श्रेष्ठ (३०) र उनका छोरा समिर श्रेष्ठ (११) लाई ठक्कर दिएको छ । दुबैको टाउको र खुट्टामा चोट लागेको र अवस्था मध्यम रहेको प्रहरीले जनाएको छ ।
भिमाद र बन्दीपुरमा पनि दुर्घटना
भिमाद नगरपालिका–५ ऋषिङपाटनमा साँझ ७ बजे मो.सा. दुर्घटनामा २५ वर्षीय अमृत परियार घाइते भएका छन् ।
त्यस्तै साँझ ७:४५ बजे बन्दीपुर गाउँपालिका–१ टिप्लेमा स्कुटर दुर्घटनामा सुरेशकुमार राई र सोनम थापा घाइते भएका छन् । दुबैलाई डुम्रे मोती अस्पतालबाट भरतपुर रिफर गरिएको छ ।
भानुमा कौडा खेल्दै गरेको पाँचजनालाई नियन्त्रणमा
यता भानु नगरपालिका–४ सेपाबगैचास्थित विष्णुमान श्रेष्ठको घरमा राति ११ बजे हारजित हुने गरी कौडा खेलिरहेका पाँचजनालाई प्रहरीले नियन्त्रणमा लिएको छ । उनीहरूसँगबाट १ सेट (१६ वटा) कौडा र नगद रु.२५ हजार १४५ रुपैयाँ बरामद भएको प्रहरीको भनाइ छ । घटनाबारे थप अनुसन्धान भइरहेको इलाका प्रहरी कार्यालय भानुले जनाएको छ ।
