तनहुँमा कारले मोटरसाइकललाई ठक्कर दिँदा आमा–छोरा घाइते
तनहुँको व्यास नगरपालिका–१२ कमलबारीस्थित पृथ्वी राजमार्गमा गए राति भएको सवारी दुर्घटनामा आमा–छोरा घाइते भएका छन्।
शुक्रवार राति ९:३० बजे डुम्रेबाट दमौलीतर्फ आउँदै गरेको ग २० प ५२२२ नम्बरको मोटरसाइकललाई सोही दिशाबाट आएको बा ६ च ७९९१ नम्बरको कारले पछाडिबाट ठक्कर दिएको प्रहरीले जनाएको छ।
दुर्घटनामा मोटरसाइकल चालक व्यास–४ का २७ वर्षीय सुवर्ण श्रेष्ठ र सोही मोटरसाइकलमा सवार उनकी आमा ४६ वर्षीया कल्पना श्रेष्ठ घाइते भएका हुन्।
चालक सुवर्ण श्रेष्ठको दुवै खुट्टा र बाँया हातमा चोट लागेको र आमा कल्पना श्रेष्ठको बाँया हात तथा ढाडमा चोट लागेको प्रहरीले जनाएको छ।
घाइते दुवैजनाको अवस्था मध्यम रहेको र उनीहरूलाई रत्नहरी अस्पताल दमौलीमा उपचार भैरहेको छ ।
प्रहरीका अनुसार दुर्घटनापछि दुवै सवारीसाधन नियन्त्रणमा लिएर आवश्यक अनुसन्धान भइरहेको छ।
