आँबुखैरेनीमा ट्याङ्कर र ट्रक ठोक्किँदा अवरुद्ध राजमार्ग साढे तीन घण्टापछि सञ्चालन
तनहुँ : तनहुँको आँबुखैरेनी गाउँपालिका–४ पावरहाउस क्षेत्रमा सोमबार साँझ ट्याङ्कर र मालवाहक ट्रक एकआपसमा ठोक्किँदा अवरुद्ध भएको पृथ्वी राजमार्ग साढे तीन घण्टापछि सञ्चालनमा आएको छ ।
जिल्ला प्रहरी कार्यालय तनहुँका अनुसार साँझ करिब ६ः१५ बजे मुग्लिनबाट आँबुखैरेनीतर्फ आउँदै गरेको मधेश प्रदेश ०३–००१ क २७०० नम्बरको तेल बोक्ने ट्याङ्कर र विपरीत दिशातर्फ जाँदै गरेको ना.५ ख. ७७७५ नम्बरको मालवाहक ट्रक एकआपसमा ठोक्किएका थिए । दुर्घटनापछि सडक दुवैतर्फ अवरुद्ध हुँदा सवारी आवागमन प्रभावित भएको थियो ।
घटनालगत्तै इलाका प्रहरी कार्यालय आँबुखैरेनीबाट प्रहरी नायब निरीक्षक द्वारिका प्रसाद घिमिरेको कमाण्डमा ट्राफिक प्रहरीसहित ३५ जनाको टोली खटिएको थियो । क्रेनको सहायताले दुर्घटनाग्रस्त दुवै सवारी साधनलाई सडक किनारमा हटाएपछि राति ९ः४५ बजेबाट राजमार्गमा सवारी आवागमन पुनः सञ्चालनमा आएको प्रहरीले जनाएको छ ।
दुर्घटनामा मानवीय क्षति भएको विवरण प्राप्त नभएको प्रहरीले जनाएको छ भने घटनाबारे थप अनुसन्धान भइरहेको छ ।
