भारी वर्षाको पूर्वानुमान : उच्च सतर्कता अपनाउन तनहुँ प्रशासन र पालिकाहरुको आग्रह

तनहुँ : जल तथा मौसम विज्ञान विभागले असोज ९ देखि ११ गतेसम्म देशका विभिन्न स्थानमा मध्यमदेखि अति भारी वर्षा हुने पूर्वानुमान गरेपछि जिल्ला प्रशासन कार्यालय तनहुँले जिल्लावासीलाई उच्च सतर्कता अपनाउन आग्रह गरेको छ ।

जिल्ला प्रशासन कार्यालय तनहुँले बिहीबार सूचना जारी गर्दै तनहुँ पनि वर्षाको जोखिममा रहेको जनाएको हो । असोज ७ गते रातिदेखि नै जिल्लाका विभिन्न स्थानमा सामान्यदेखि मध्यम वर्षा भइरहेको र आगामी दिनमा थप वर्षा हुनसक्ने भएकाले आवश्यक पूर्वतयारी अपनाउन प्रशासनले अनुरोध गरेको छ ।

प्रशासनले नदी तथा खोलाको तटीय क्षेत्रमा बसोबास गर्ने नागरिकलाई सम्भावित जोखिमलाई मध्यनजर गर्दै सुरक्षित स्थानमा सर्न आग्रह गरेको छ । स्थानान्तरणका क्रममा समस्या आएमा सम्बन्धित स्थानीय तह तथा नजिकको सुरक्षा निकायसँग समन्वय गरी सहयोग लिनसमेत अनुरोध गरिएको छ ।

त्यस्तै, रातको समयमा अत्यावश्यकबाहेक लामो दूरीको यात्रा नगर्न प्रशासनले आग्रह गरेको छ । यात्रा गर्नैपर्ने अवस्था आएमा स्थानीय तह तथा सुरक्षा निकायबाट आवश्यक सूचना लिएर मात्र यात्रा गर्न र गन्तव्यमा पुगेरै छाड्नेभन्दा आफू रहेको स्थान आसपासकै सुरक्षित ठाउँमा रोकिएर बस्न सुझाव दिइएको छ ।

अत्यावश्यक यात्रा गर्नुपर्ने अवस्थामा अतिरिक्त कपडा, ड्राइफुड, खानेपानी, मोबाइल चार्जर तथा प्राथमिक उपचारका आधारभूत औषधि साथमा राख्न प्रशासनले आग्रह गरेको छ ।

वृद्धवृद्धा, अपाङ्गता भएका व्यक्ति, बिरामी तथा बालबालिकालाई सम्भावित जोखिमबाट जोगाउन पूर्वतयारीसहित सुरक्षित स्थानमा स्थानान्तरण गर्न पनि प्रशासनले अनुरोध गरेको छ ।

प्रशासनले सम्भावित बाढी, पहिरो तथा डुबानको जोखिमप्रति सचेत रहँदै स्थानीय तह र सुरक्षा निकायबाट जारी हुने सूचनालाई ध्यानपूर्वक पालना गर्न जिल्लावासीलाई आग्रह गरेको छ ।

यस्तै, तनहुँका विभिन्न स्थानमा भारीदेखि अति भारी वर्षा हुनसक्ने पूर्वानुमानसंगै व्यास नगरपालिका, भानु नगरपालिका, आँवुखैरेनी गाउँपालिका, बन्दीपुर गाउँपालिकाले नगरवासीलाई उच्च सतर्कता अपनाउन आग्रह गर्दै शुक्रबार विद्यालयहरुलाई सार्वजनिक विदा दिएका छन् ।

पालिकाहरुले बिहीबार अत्यन्त जरुरी सूचना जारी गर्दै वर्षाका कारण बाढी, पहिरो, डुबान, नदी कटानलगायत विपद्को जोखिम हुनसक्ने जनाएका हुन् । सम्भावित जोखिमलाई मध्यनजर गर्दै नदी, खोला, खोल्सा तथा तटीय क्षेत्रमा उच्च सतर्कता अपनाउन अनुरोध गरिएको छ ।

पालिकाहरुले पहिरोको जोखिम भएका क्षेत्रमा बसोबास गर्ने परिवारलाई विशेष सतर्क रहन तथा आवश्यक परे सुरक्षित स्थानमा जानका लागि पूर्वतयारी अवस्थामा रहन आग्रह गरेका छन् । घर वरिपरिका पानी निकासका नाला, कुलो तथा ढल सफा राख्न, विद्युत्का तार तथा पोल र कमजोर संरचनाबाट टाढा रहन पनि अनुरोध गरिएको छ ।