जोखिम मोल्दै झोलुङ्गे पुलबाट ट्रान्सफर्मर ल्याएर प्यूघर क्षेत्रका ६२ घरधुरीमा विद्युत सेवा सुचारु
तनहुँ : तनहुँको आँबुखैरेनी गाउँपालिका–६ प्यूघरमा जलेर बिग्रिएको ट्रान्सफर्मर परिवर्तन गरी विद्युत् सेवा पुनः सञ्चालन गरिएको छ । तर, नयाँ ट्रान्सफर्मर सम्बन्धित स्थानसम्म पुर्याउन भने स्थानीयवासी र नेपाल विद्युत् प्राधिकरणका कर्मचारीले त्रिशूली नदीमाथिको झोलुङ्गे पुलको सहारा लिनुपरेको छ ।
केही दिनअघि प्यूघरमा जडान गरिएको ट्रान्सफर्मर जलेपछि त्यस क्षेत्रको विद्युत् आपूर्ति अवरुद्ध भएको थियो । नेपाल विद्युत् प्राधिकरण भरतपुर वितरण केन्द्रले पुरानो ट्रान्सफर्मर हटाएर नयाँ ट्रान्सफर्मर जडान गरेपछि अहिले विद्युत् सेवा नियमित भएको जनाएको छ ।
भरतपुर वितरण केन्द्रका सूचना अधिकारी विनोद ढकालका अनुसार नयाँ ट्रान्सफर्मर प्यूघर पुर्याउन स्थानीयवासीले सहयोग गरेका थिए। त्रिशूली नदीमाथि रहेको झोलुङ्गे पुलबाट ट्रान्सफर्मर मानिसकै सहयोगमा बोकेर नदी पार गराइएको र त्यसपछि सवारीसाधनमार्फत सम्बन्धित स्थानसम्म पुर्याएर जडान गरिएको उनले जानकारी दिए ।
ट्रान्सफर्मर परिवर्तन भएपछि प्यूघरका ६२ घरधुरीमा विद्युत् सेवा पुनः सञ्चालन भएको छ । विद्युत् आपूर्ति बन्द हुँदा प्रभावित स्थानीयवासीलाई नयाँ ट्रान्सफर्मर जडानसँगै राहत मिलेको छ ।
तर, ट्रान्सफर्मर पुर्याउने क्रममा देखिएको कठिनाइले प्यूघर क्षेत्रमा रहेको पूर्वाधारको समस्या फेरि उजागर गरेको छ । आवश्यक सामग्री ओसारपसारका लागि सहज सडक तथा पक्की पुलको अभावका कारण स्थानीयवासीले अझै पनि झोलुङ्गे पुलबाट मानिसकै भरमा सामग्री बोक्नुपर्ने अवस्था रहेको छ ।
घुमाउनेमा निर्माणाधीन पक्की पुल लामो समयदेखि अलपत्र अवस्थामा रहेकाले सवारीसाधनमार्फत विद्युतीय उपकरण तथा अन्य आवश्यक सामग्री सम्बन्धित स्थानसम्म पुर्याउन कठिनाइ हुँदै आएको स्थानीयको भनाइ छ । उक्त पुल निर्माण सम्पन्न भएको भए ठूला तथा अत्यावश्यक सामग्री सवारीसाधनबाटै सहज रूपमा ओसारपसार गर्न सकिने अवस्था हुने स्थानीय बताउँछन् ।
तर पक्की पुल निर्माण पूरा नहुँदा नदी वारपारका लागि पुरानै झोलुङ्गे पुलमा निर्भर हुनुपरेको छ । यसपटक जलेको ट्रान्सफर्मर फेर्न ल्याइएको नयाँ ट्रान्सफर्मरसमेत यही पूर्वाधार अभावका कारण झोलुङ्गे पुलबाट बोकेर नदी पार गराउनुपरेको सूचना अधिकारी ढकालले बताए ।
स्थानीयवासीका अनुसार सडक तथा पुलको अवस्थाका कारण विद्युतका उपकरण मात्र नभई खाद्यान्न, निर्माण सामग्री र दैनिक उपभोग्य वस्तु ओसारपसारमा समेत समस्या हुँदै आएको छ । सामान्य अवस्थामा मानिसले बोकेर सामग्री ओसार्न सकिए पनि आपत्कालीन अवस्थामा आवश्यक पर्ने भारी तथा अत्यावश्यक सामग्री लैजान झनै कठिन हुने गरेको उनीहरूको भनाइ छ ।
प्यूघरमा विद्युत् सेवा पुनः सञ्चालन भए पनि ट्रान्सफर्मर बोकेर झोलुङ्गे पुल पार गराउनुपरेको घटनाले दुर्गम बस्तीमा आधारभूत पूर्वाधारको पहुँच कति कमजोर छ भन्ने देखाएको छ । स्थानीयवासीले घुमाउनेमा अलपत्र रहेको पक्की पुल निर्माण सम्पन्न गरी सडक तथा यातायातको पहुँच सहज बनाउनुपर्ने माग गर्दै आएका छन् ।
विद्युत्, खाद्यान्न तथा अन्य अत्यावश्यक सेवा र सामग्रीको नियमित आपूर्तिका लागि सडक र पुलजस्ता पूर्वाधार अपरिहार्य भए पनि निर्माणाधीन संरचना समयमै सम्पन्न नहुँदा स्थानीयले दैनिक जीवनमै त्यसको प्रत्यक्ष असर भोग्नुपरेको छ । प्यूघरमा ट्रान्सफर्मर परिवर्तनको क्रममा देखिएको समस्या यस क्षेत्रको दीर्घकालीन पूर्वाधार सुधारको आवश्यकताको अर्को उदाहरण बनेको छ ।
