शुक्लागण्डकीमा मृत भेटिएका तीन मध्ये दुई जनाको सनाखत
तनहुँ : गत शनिबार तनहुँको शुक्लागण्डकी नगरपालिका–५ कसेरीस्थित फोहरमैला प्रशोधन केन्द्र नजिक मृत अवस्थामा भेटिएका तीन जनामध्ये दुई जनाको सनाखत भएको तनहुँ प्रहरीले जनाएको छ ।
मृत अवस्थामा भेटिएका तीन जनामध्ये दुई जनाको सनाखत गरी शव परीक्षणपश्चात् आफन्तले शव बुझेको र एक जनाको अझै सनाखन हुन नसकेको जिल्ला प्रहरी कार्यालय तनहुँले जनाएको छ ।
मृत भेटिएका शुक्लागण्डकी नगरपालिका–११ बस्ने ४१ वर्षीय नारायण विक शनिबार र भिमाद नगरपालिका–८ भागर बस्ने ५८ वर्षीया देउमाया थापाको आइतबार सनाखत भएको जिल्ला प्रहरी कार्यालय तनहुँका प्रहरी नायब उपरिक्षक श्रवणकुमार विकले जानकारी दिए ।
तीन जनाको नै हत्या भएको प्रहरीको आशंका छ । घटनासम्बन्धमा थप अनुसन्धान भइरहेको उनले जानकारी गराए ।
तनहुँको शुक्लागण्डकी नगरपालिकामा शनिबार विभत्स रुपमा हत्या गरिएको अवस्थामा तीन शव भेटिएका थिए । शुक्लागण्डकी नगरपालिका–५ स्थित कसेरीमा दुई पुरुष र करिब सात सय मिटरको दुरीमा एक महिलाको शव भेटिएको थियो ।
जिल्ला प्रहरी कार्यालय तनहुँका अनुसार कसेरीघाटमा निर्माणाधिन फोहोरमैला प्रशोधन केन्द्रको कम्पाउण्ड बाहिर दुई जना पुरुष र सो घटनास्थलको केही पर एक महिलाको शव भेटिएको थियो ।
उक्त घटनामा फोहोरमैला प्रशोधन केन्द्रमा गार्डका रुपमा काम गर्दै आएका नारायण विकाको शनिबारै सनाखत भएको थियो ।
यस्तै, महिलाको शवको आइतबार सनाखत भएको ती महिलासंगै बस्दै आएको भनिएका एक पुरुषको भने सनाखत हुन नसकेको प्रहरी जनाएको छ । उनिहरु श्रीमान श्रीमती रहेको र प्रशोधन केन्द्र बाहिर टहरा बनाई संगै बस्दै आएको बताइएको छ ।
ती महिला पुरुषले शुक्लागण्डकी नगरपालिकाको बजार क्षेत्रबाट संकलन गरिएको फोहोरमैलाबाट कवाडी संकलन गर्ने गरेको स्थानीयले बताएका छन् ।
यस्तै, इलाका प्रहरी कार्यालय बेलचौताराका प्रमुख प्रहरी निरीक्षक धननारायण श्रेष्ठका अनुसार घटनाको प्रकृति शंकास्पद भएकाले जिल्ला प्रहरी कार्यालय तनहुँका प्रमुख प्रहरी उपरीक्षक टेकबहादुर कार्कीसहितको प्राविधिक टोली र तालिम प्राप्त कुकुर सहितको प्रहरी टोलीले स्थलगत अध्ययन अनुसन्धान अगाडि बढाएको छ ।
