“बलराम बानियाँ स्मृति पत्रकारिता पुरस्कार”का लागि कोष स्थापना
भञ्ज्याङ समाचारदाता (दमौली)
प्रेस युनियन तनहुँले स्वर्गीय पत्रकार बलराम बानियाँको स्मृतिमा पत्रकारिता अक्षय कोष स्थापना गरेको छ। तनहुँको भानु नगरपालिका-१३ निवासी बानियाँको स्मृतिमा प्रेस युनियनले पत्रकारिता अक्षय कोष स्थापना गरेको हो । कोषका लागि बानियाँका दाजु भानु नगरपालिका-१३ का वडाध्यक्ष रामबहादुर बानियाँले रु २० हजार सहयोग गरेका छन् ।
उक्त रकम बानियाँले प्रेस युनियन तनहुँका अध्यक्ष अमरराज नहर्कीलाई मंगलबार हस्तान्तरण गरेका छन् । वडाध्यक्ष बानियाँले स्व बलरामले पत्रकारिता क्षेत्रमा पुर्याएको योगदानको स्मरण गर्दै पत्रकारिता पुरस्कार प्रदान गर्न अक्षय कोष निर्माण कार्यको शुरुआत गरेकामा प्रेस युनियन तनहुँलाई धन्यवाद ज्ञापन गरे ।
अक्षय कोषका लागि परिवारकै तर्फबाट साथ, सहयोग, हौसला र रकम प्रदान गरेकामा युनियनका अध्यक्ष नहर्कीले आभार व्यक्त गरे । पत्रकारिता अक्षय कोषको ब्याजबाट समाज परिवर्तनको लागि विशिष्ट योगदान पुर्याएका व्यक्तिलाई पुरस्कार प्रदान गरिने नहर्कीले जानकारी दिए । अक्षय कोषका लागि परिवारजनको सल्लाहअनुसार युनियनका अध्यक्ष नहर्कीको संयोजकत्वमा तीन सदस्यीय अक्षय कोष निर्माण समिति गठन गरिएको छ ।
समितिको सदस्यमा बाबुराम खनाल र स्व बलराम बानियाँका दाजु क्या जगतबहादुर बानियाँ छन् । पत्रकार बलराम बानियाँको परिवारजन, आफन्तजनका साथै स्वदेश तथा विदेशमा रहेका शुभेच्छुकबाट संकलन गरी अक्षय कोषमा रकम जम्मा गरिनेछ । कान्तिपुर दैनिकका सहायक सम्पादक बानियाँको गत साउन २६ गते निधन भएको थियो।
