१२ स्वर्णसहित व्यासलाई राष्ट्रपति रनिङ शिल्ड, विद्यालयभरमा सत्यवती पहिलो, मित्रता दोश्रो र पञ्चमुनिदेव तेश्रो

तनहुँको दमौलीमा आयोजना गरिएको १२औं जिल्लास्तरीय राष्ट्रपति रनिङ शिल्ड प्रतियोगितामा व्यास नगरपालिकाले १२ स्वर्णपदक सहित राष्ट्रपति रनिङ शिल्ड हातपार्न सफल भएको छ । बीपी वन वाटिका र दमौली खेल मैदानमा सञ्चालन गरिको प्रतियोगितामा सर्वाधिक पदकका साथ नगरपालिकालाई शिल्ड प्रदान गरिएको हो । यस अघि विद्यालयलाई नै शिल्ड दिने गरिएकामा यस पटकबाट धेरै पदक प्राप्त गर्ने तहलाई शिल्ड दिन थालिएको जिल्ला खेलकुद विकास समितिका अध्यक्ष अनिल पाण्डेले बताए ।

प्रतियोगितामा व्यास नगरपालिकाले १२ स्वर्ण, नौ रजत र पाँच कास्य पदक पाएको छ । प्रतियोगितामा सत्यवती माध्यमिक विद्यालय पहिलो हुन सफल भएको छ । बिगतमा एक पटक शिल्ड उचालेको र एक वर्षअघिको प्रतियोगितामा प्रथम भएको सत्यवती यसपाली पनि पहिलो हुन सफल भएको छ ।

प्रतियोगितामा सत्यवतीले छ स्वर्णसहित १२ पदक पाएको छ । उसका पोल्टामा तीन रजत र तीन कास्य पदक परेका छन् । सत्यवतीपछि आँबुखैरेनीको मित्रता मावि आएको छ । प्रतियोगितामा दोश्रो भएको मित्रताले पाँच स्वर्ण, दुइ रजत र दुइ कास्य पदक जितेको छ ।
यस्तै, तीन स्वर्ण, दुइ रजत र एक कास्य पदक पाएको शुक्लागण्डकीको पञ्चमुनीदेव माध्यमिक विद्यालय तेश्रो भएको छ । जिल्ला खेलकुद विकास समितिका अध्यक्ष अनिल पाण्डेको सभापतित्वमा भएको कार्यक्रममा जिल्ला समन्वय समितिका प्रमुख शान्तिरमण वाग्लेले विजेतालाई पुरस्कृत गरेका थिए ।

जिल्ला खेलकुद विकास समिति तनहुँका अध्यक्ष अनिल पाण्डेको अध्यक्षतामा भएको प्रतियोगिताको शुक्रबार शुभारम्भ गर्दै तनहुँ क्षेत्र नम्बर १ का प्रतिनिधि सभा सदस्य कृष्णकुमार श्रेष्ठ किसानले खेल क्षेत्रको विकासमा लागि पर्ने प्रतिवद्धता जनाएका थिए । प्रमुख जिल्ला अधिकारी सागर आचार्यले खेल क्षेत्रको विकास र युवा सहभागिता बढाउन प्रतियोगिताको भूमिका रहेको बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर