व्यासले अत्यावश्यक परिस्थितिमा नगरपालिकाकै सवारी सञ्चालन गर्ने

तनहुँको व्यास नगरपालिकाले कोभिड संकटको घडीमा अत्यावश्यक परिस्थितिमा नगरपालिकाका सवारी साधन परिचालन गर्ने भएको छ । कतिपय जिल्लामा कोभिडका बिरामीले एम्बुलेन्स लगायत सवारी साधन नपाएको विषय सार्वजनिक भइरहेको समयमा नगरपालिकाले यो निर्णय गरेको हो । नगर क्षेत्रमा पछिल्लो समय संक्रमितको संख्या बढ्दै गएको अवस्थालाई ख्याल गर्दै नगरपालिकाले हाल आवश्यक सेवाका लागि उद्योग वाणिज्य संघ दमौली बजार एकाइबाट नगरपालिकालाई हस्तान्तरण भएको एम्बुलेन्स सञ्चालन गरेको छ र अवस्था जटिल बन्दै गएको अत्यावश्यक परिस्थितिमा नगरपालिकाकै सवारी साधान सञ्चालन ल्याउने नगरप्रमुख बैकुण्ठ न्यौपानले बताएका छन् ।

नगरपालिकाले आफ्नै एम्बुलेन्स खरीदका लागि यसअघि नै प्रक्रिया अगाडि बढाए पनि ढिलाइ भएको छ । नगरपालिकाले सिप्रदीसँग १२ लाख ९५ हजार रुपैयाँको सम्झौता गरी गत फागुन १३ गते रकम दाखिला गरिसकेको छ । चैत मसान्तसम्म एम्बुलेन्स हस्तान्तरण गर्ने भनिए पनि हालसम्म एम्बुलेन्स नआएको नगरप्रमुख न्यौपानेले बताएका छन् ।

नगरपालिकाको वडा नं. ९, १० र १४ मा थप एम्बुलेन्स खरीदको प्रक्रिया अगाडि बढिरहेको न्यौपानेले बताए । अक्सिजनको अभाव रहेको, कोभिड-१९ का कारण जनप्रतिनिधिसमेत आम नागरिकको दिनानुदिन मृत्यु भइरहेको, अधिकांश अस्पताल बिरामीले भरिएका, उपचार अभावमा नागरिकले अकालमै ज्यान गुमाउनु परेकाले यो जोखिमपूर्ण अवस्थामा उच्च सतर्कता अपनाउन नगरवासीलाई आग्रह गरिएको छ ।

यस्तै, नगरपालिकाले हप्ताको दुइ दिन सोमबार र बिहीबार पीसीआर परीक्षणका लागि स्वाब संकलनको व्यवस्था मिलाउँदै आएको छ । १५ जनाभन्दा बढी भएमा तत्कालै स्वाब संकलनको व्यवस्था मिलाइने नगरपालिकाले जनाएको छ । यसअघि नगरपालिकाले सोमबार मात्रै स्वाब संकलन गर्ने गरे पनि संक्रमणको दर बढ्दै गएपछि हप्ताको दुइ दिन बनाएको थियो ।

हाल सो नगरपालिकामा ४९ सक्रिय संक्रमित छन् भने आठजना संक्रमणमुक्त भएका छन् । सक्रिय संक्रमितलाई बारम्बार सम्बन्धित वडाका लागि फोकल पर्सनका रूपमा जिम्मेवारी तोकिएका स्वास्थ्य सेवाका कर्मचारीले निग्रानी गर्ने व्यवस्था मिलाइने नगरपालिकाका स्वास्थ्य शाखाप्रमुख प्रमोद सोतीले जानकारी दिए । जटिल प्रकृतिका बिरामीलाई निःशुल्क रूपमा अस्पतालसम्म लैजाने व्यवस्था पनि नगरपालिकाले मिलाएको छ ।

नगरपालिकाले प्रत्येक वडाका लागि फोकल पर्सन तोकेको छ । वडाका सक्रिय संक्रमितको सुविधाका लागि नगरपालिकाले १४ वटै वडामा फोकल पर्सन तोकेको हो । वडा नं. १ मा उषा हड्खले, २ मा सुनिल अधिकारी, ३ मा रक्षा काफ्ले, ४ मा सरोज मिश्र, ५ मा उज्ज्वल न्यौपाने, ६ मा रामबहादुर गुरुङ, ७ मा मीना लौडारी, ८ मा पूजा सोती, ९ मा देवीन्द्र कार्की, १० मा सरिता बोटे, ११ मा मिलन सुर्खाली, १२ मा हरिशचन्द्र न्यौपाने, १३ मा सागर तिवारी र १४ मा पप्पु पंकज यादवलाई फोकल पर्सन तोकिएको छ ।

यस्तै, विद्यालयका स्थगित परीक्षाहरुको सञ्चालन सम्बन्धमा कोभिड-१९ को विषम् परिस्थितिलाई मध्येनजर गरी जेठ २ गते पछि आवश्यक निर्णय गरिने हुँदा सम्पूर्ण विद्यार्थीहरुलाई सोही अनुसार सुचना संप्रेषण गरी अभिभावक एवं शिक्षकहरुको प्रत्यक्ष परोक्ष निग्रानीमा सुरक्षीत तवरबाट घरघरमै बस्ने मिलाउने नगरपालिकाले आग्रह गरेको छ ।

नगरपालिका क्षेत्र अन्तरगत सञ्चालित बैंक तथा वित्तीय संस्थाहरु आ-आफ्नो केन्द्रीय नीति एवं कोभिड-१९ जिल्ला संकट व्यवस्थापन केन्द्रको निर्णयानुसार वैंकिङ गतिविधिहरु सञ्चालन गर्न अनुरोध गरिएको छ ।

यस्तै, निर्माण व्यवसायीहरुबाट प्रदान गरिने निर्माण कार्यहरु सम्बन्धी सेवाहरुलाई सावधानिपूर्वक कोभिड-१९ जिल्ला संकट व्यवस्थापन समितिको निर्णयानुसार सञ्चालन गर्नु नगरपालिकाले आग्रह गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर