अपाङ्गता भएका व्यक्तिहरुलाई तरकारी तथा फलफूल खेतीको लागि आर्थिक सहयोग
भञ्ज्याङ न्यूज
स्वास्थ्य कार्यालय तनहुँको सहयोगमा अपाङ्गता भएका व्यक्तिहरुको अधिकार र विकासका लागि श्रोत केन्द्र (रिसेड) तनहुँले तरकारी तथा फलफूल खेती गर्नकालागि विभिन्न प्रकारका २६ जना अपाङ्गता भएका व्यक्तिहरुलाइ तालिम तथा सहयोग वितरण गरेको छ ।
दमौलीमा आयोजीत एक कार्यक्रममा गण्डकी प्रदेशका सांसद डोवाटे विकले सहयोग सम्बन्धीत व्यक्ति तथा उनीहरुका अभिभावकलाई वितरण गरेका थिए ।
तनहुँका विभिन्न ८ वटा स्थानीय तहका अपाङ्गता भएका व्यक्तिहरुको माग संकलन गरी ११ जनालाई तरकारी खेती, ९ जनालाई कागती खेती, ३ जनालाई केराखेती, २ जनालाई सुन्तला खेती र १ जनालाई अदुवा खेतीका लागि प्रति व्यति ५ हजार रुपैयाँका दरले सहयोग प्रदान गरिएको बताइएको छ ।
यसरी सहयोग पाएका अपाङ्गता भएका कृषक तथा उनीहरुका अभिभावकहरुले तरकारी तथा फलफूल खेती सम्बन्धी तालिम समेत प्रदान गरिएको रिसेडका महासचिव दामोदर रेग्मीले जानकारी गराए ।
कार्यक्रमबाट सहयोग पाएका व्यास नगरपालिका-१० डिहीगाउँका विष्णुप्रसाद अधिकारीले खुशी व्यक्त गर्दै हामीले तरकारी खेती त अलीअली गरीरहेकै हो तर अहीले थप सहयोग पाएर यसलाई अझधेरै तरकारी खेतीगरी आम्दानीमा बृद्धिगर्ने हौसला प्रदान गरेको छ ।
यस्तै, अदुवा खेतीका लागि सहयोग पाएका घिरिङका डुल बहादुर थापाले आफुले २ रोपनीमा अदुवा खेती लगाउने सोचेको भएता पनि सहयोग पाइने भएपछि अहिले ४ रोपनी क्षेत्रफलमा अदुवा लगाएको र सम्पूर्ण परिवारले त्यसमा सहयोग गरिरहेको बताए ।
जिल्ला स्वास्थ्य कार्यालयका सुनील लामीछानेले यसरी खेतीगर्ने व्यक्तिहरुलाई अप्ठयारो पनि पर्न सक्ने भएकाले नियमीत अनुगमन र प्राविधिक सहयोग गर्न सम्बन्धित संस्थालाई आग्रह गरेका थिए ।
