तनहुँमा लम्बियो निषेधाज्ञा, बिहान ७ देखि साँझ ६ बजेसम्म व्यापार व्यवसाय खोलिने

कोरोना संक्रमण रोकथाम तथा न्युनिकरणका लागि भन्दै जारी गरिएको निषेधाज्ञा तनहुँमा भदौं २१ गतेसम्म लम्बाइएको छ । जिल्ला कोभिड व्यवस्थापन समितिको आइतबार बसेको बैठकले भदौं २१ गते राती १२ बजेसम्म लागु हुने गरेर निषेधाज्ञा लम्बाउन सिफारिस गरेको छ ।

कोभिड-१९ को जोखिम अझै कमी नभएको अवस्थालाई ध्यानमा राखि समितिको सिफारिसको आधारमा निषेधाज्ञालाई निरन्तरता दिएको प्रमुख जिल्ला अधिकारी सागर आचार्यले बताए । उनले भने, ‘कोभिड संकट व्यवस्थापन समितिको बैठकको सिफारिस बमोजिम कोभिड संकट व्यवस्थापन सम्बन्धमा व्यवस्था गर्न बनेको अध्यादेश, २०७८ को दफा ४ र स्थानीय प्रशासन ऐन, २०२८ को दफा ६ को उपदफा ३ ले दिएको अधिकारको प्रयोग गरी जिल्लाभर निषेधाज्ञालाई जारी गरिएको हो ।’

उक्त बैठकले स्वास्थ्य र सुरक्षाको मापदण्ड पुरा गरेर निर्वाध रुपमा व्यापार व्यवसाय सञ्चालन हुने वातावरण बनाउन आग्रह गरेको छ । अत्यावश्यक सेवाहरु सहित अन्य व्यापार व्यवसायलाई पनि खुल्ला गर्दै लगिएको छ । प्रशासनले सेवा तथा व्यवसाय बिहान ७ देखि साँझ ६ बजेसम्म खोल्न दिइने भएको छ ।

त्यस्तै, सिनेमा हल, पार्टी प्यालेस, डान्स बार, दोहोरी, नाचघर, क्लब, हेल्थ क्लव, सैलुन सेवा, व्यटिपार्लर (कस्मेटिक बिक्री बाहेक), जिम खाना, स्विमिङ पुल, फुटसल, सभा, आमसभा, जुलुस, हाटबजार, साइकल र मोटरसाइकलमा गरिने व्यापार, रंगशालामा हुने दर्शक सहितको खेलकुद, तालिम, सेमिनार, भर्जुअल बाहेक भौतिक उपस्थितीमा गरिने शिक्षण प्रशिक्षण र मानिसहरुको भिडभाड हुने अन्य सबै प्रकारका कार्यक्रमहरु पूर्ण रुपमा बन्द गर्न प्रशासनले आग्रह गरेको छ । निषेधाज्ञाको अवधिमा सार्वजनिक सवारी साधानहरु विहान ६ बजेदेखि साँझ ६ बजेसम्म मात्र सिट क्षमता भित्र रहि स्वास्थ्य सुरक्षाका मापदण्ड अप्नाई सञ्चालन गर्ने गराउने निर्णय गरेको छ ।

यस्तै, परीक्षाहरु तोकिएको समायमा स्वास्थ्य तथा सुरक्षाको मापदण्ड पालना गर्ने गराउने गरी सञ्चालन गर्न आग्रह गरेको छ । जिल्लाबासीलाई अनावश्यक रुपमा घरबाहिरा ननिस्कना बैठकले आग्रह गरेको छ । त्यस्तै, भारत र अन्य मुलुकबाट जिल्लामा आउने व्यक्तिले अनिवायर्य रुपमा १० दिन क्वारेन्टिनमा बस्नुपर्ने प्रमुख जिल्ला अधिकारी आचार्यले बताए ।

जिल्लाका सम्पूर्ण संघसंस्था, पेशाकर्मी, व्यवसायी तथा आम नागरिकले प्रशासनको आदेश पालना गर्नुपर्ने र यदि कोहीकसैबाट आदेश उल्लंघन भएमा कोभिड-१९ संकट व्यवस्थापन सम्बन्धमा व्यवस्था गर्न बनेको अध्यदेश, २०७८ तथा स्थानीय प्रशासन ऐन, २०२८ बमोजिम कारवाही हुने जिल्ला प्रशासन कार्यालयले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर