स्वर्णपदक विजेता प्रतिमालाई वडा कार्यालयद्वारा सम्मान
भञ्ज्याङ न्यूज
प्रथम शिखर वार राष्ट्रिय बुदोकैदो कराँते प्रतियोगिताको स्वर्णपदक विजेता प्रतिमा सुनारलाई शुक्लागण्डकी नगरपालिका-५ नं. वडा कार्यालयले सम्मान गरेको छ । आफ्नो खेल कौशल मार्फत नगर तथा वडाको गरिमा बढाएको भन्दै बुधबार एक कार्यक्रमको आयोजना गरी वडा कार्यालयले सम्मान पत्रद्वारा सम्मान् गरेको हो । सोहि क्रममा लालिगुराँस युवा क्लबले पनि उनलाई सम्मान गरेको थियो ।
बेलचौतरा निवासी सुनारले महिला खुल्ला तौल समूहमा भक्तपुर शिखर वारकी शर्मिला महर्जनलाई हराउँदै १ तोला सुनको पदकसहित नगद पाँच हजार हात पारेकी थिइन् । सम्मान कार्यक्रममा बोल्दै वडाध्यक्ष दीर्घबहादुर थापाले स्वर्ण पदक धारी सुनारलाई बधाई दिदै खेल्नका लागि आवश्यक सामाग्री सहयोग गर्ने प्रतिवद्धता जनाए ।
उनले आफ्नो आगामी खेल योजना वडामा पेस गर्न आग्रह गर्दै सरकारले खेलाडीलाई प्रोत्साहन गर्नुपर्ने बताए । सो अवसरमा प्रतिमाको बुबा आमालाई समेत सम्मान गरिएको वडाले जनाएको छ। कार्यक्रममा वडा सदस्य पदम प्रसाद तिमिल्सिना, वडा सचिव शिव पौडेल, बुबा सोमबहादुर सुनार लगायतले बधाई दिएका थिए ।
