मृतकका आफन्तले दुइ दिन पछि शव बुझे, मृतकका परिवारलाई क्षतिपूर्ति र घाइतेको उपचार गर्ने सहमति
भञ्ज्याङ समाचारदाता/दमौली
तनहुँको बन्दिपुर गाउँपालिका-६ धरमपानी बाक्सेमा शुक्रबार साँझ भएको जीप दुर्घटनाका मृतकका आफन्तले दुइ दिनपछि शव बुझेका छन् । दुर्घटनामा मृत्यु भएकाहरुलाई कानून बमोजिम पाउनुपर्ने राहत उपलब्ध गराउने र घाइतेको उपचार खर्च बेहोर्ने सहमति भएपछि पीडितले आइतबार साँझ शव बुझेका हुन् । सहमतिसँगै दमौली अस्पतालमा राखिएको शवको पोष्टमार्टम गरी आफन्तलाई बुझाइएको छ।
पीडित पक्ष, पीडक र प्रशासन प्रहरीबीच भएको त्रिपक्षीय छलफलमा सहमति जुटेपछि आफन्तजनले शव बुझेको बताइएको छ । मृतकका परिवारलाई बीमावापतको पाँच लाख रुपैयाँका दरले क्षतिपूर्ति दिने र घाइतेको जीपका धनीले उपचार खर्च बेहोर्ने सम्झौता भएको छ । मृतकका परिवारलाई काजकिरीया बापत ५० हजार रुपैयाँका दरले आइतबारै प्रदान गरी बाँकी चार लाख ५० हजार रुपैयाँ २५ दिनभित्र बुझाउने सहमतिअनुरुप आफन्तजनले शव बुझेका हुन् ।
बन्दिपुर-६ का ५३ वर्षीय हरि न्यौपाने र ४८ वर्षीया सुशीलादेवी न्यौपानेबाहेक अन्यको शव आफन्तले बुझेको स्थानीय सिद्धान्त थापामगरले जानकारी दिए । मृतक न्यौपानेद्वय श्रीमान्-श्रीमती हुन् । निजका छोरा रोजगारीको सिलसिलामा विदेशमा रहेकाले छोरा आएपछि शव बुझने बताइएको छ ।
दुर्घटनामा परी मृत्यु भएका सोही स्थानका २४ वर्षीय रोशन गुरुङ, नौ महिनाकी आरुबी थापा, ४८ वर्षीय सन्तबहादुर गुरुङ र ५० वर्षीया बिमाया गुरुङको शव आइतबार साँझ परिवारले बुझी लगेका छन् । साराङघाटबाट बन्दिपुरतर्फ जाँदै गरेको ग१ज ६५५५ नम्बरको जीप बन्दिपुर-६ धरमपानीमा दुर्घटना हुँदा छ जनाको मृत्यु भएको थियो भने ८ जना घाइते भएका थिए ।
दुर्घटनामा परी घाइते भएका अन्य आठमध्ये दुइ जना डिस्चार्च भई घर फर्किएको जिल्ला प्रहरी कार्यालय तनहुँका प्रहरी नायब उपरीक्षक युवराज खड्काले जानकारी दिए । अन्यको भरतपुर शिक्षण अस्पताल चितवनमा उपचार भइरहेको बताइएको छ ।
