शुक्लागण्डकीमा गठबन्धनबाट प्रमुखमा कांग्रेसका पण्डित र उपप्रमुखमा माओवादीका वि.क. निर्वाचित
भञ्ज्याङ न्यूज
तनहुँको शुक्लागण्डकी नगरपालिकामा प्रमुख र उपप्रमुख गठबन्धनले जितेको छ । प्रमुखमा नेपाली कांग्रेसका उम्मेदवार कृष्णराज पण्डित र उपप्रमुखमा नेकपा माओवादी केन्द्रका खुमबहादुर विक निर्वाचित भएका छन् ।
बुधबार साँझ सार्वजनिक अन्तिम मतपरिणाम अनुसार प्रमुख पण्डितले दुइ हजार ४२३ को मतान्तरबाट निर्वाचित भएका हुन् । पण्डितले १२ हजार २६३ मत प्राप्त गरेका छन् भने उनका प्रतिस्पर्धी नेकपा एमालेका मुक्तिनाथ तिम्सिनाले ९ हजार ८४० मत प्राप्त गरेका छन् ।
गत शनिबारबाट सुरु भएको मतगणना पाँचदिन पछि बुधबार साँझ सार्वजनिक अन्तिम मतपरिणाम अनुसार उपप्रमुखमा पनि गठबन्धनबाटै माओवादी केन्द्रका खुमबहादुर विकले ३०५ को मतान्तरबाट निर्वाचित भएका छन् । विकले १० हजार २६२ मत प्राप्त गरेका छन् भने उनका प्रतिस्पर्धी एमालेकी फूलमाया वाग्लेले ९ हजार ९५७ मत पाएकी छन् ।
१२ वडा रहेको शुक्लागण्डकीको १, २, ३, ४ र ७ वडामा नेपाली कांग्रेस, वडा नं. ५, ६, ८, ९, ११ र १२ मा एमाले र नेकपा माओवादी केन्द्रका उम्मेदवारले वडा नं. १० मा वडाध्यक्ष निर्वाचित भएका छन् । एमालेले सबै गरेर नगरपालिकामा ३५ सिट जित्न सफल भएको छ । २०७४ सालको निर्वाचनमा काँग्रेसले मेयरसहित ३ वटा वडा, एमालेले उपमेयर सहित ७ वडा र माओवादीले दुइ वटा वडामा जीत हाँसिल गरेको थियो ।
३८ हजार ३१५ मतदाता रहेको नगरपालिकाको निर्वाचनमा २५ हजार ९९७ मत खसेको थियो । नगरपालिकाको वडा नं. १ मा रविचन्द्र पौडेल (१११३), २ मा सुमन मगर (९२५), ३ मा सचिन भुजेल (८०५), ४ मा राजकुमार वाग्ले (७७८), ५ मा दीर्घबहादुर थापा (१२१९), ६ मा बुद्धि थापा (१२७३), ७ मा खड्गसिं थापा (१०७९), ८ मा नारायणसिं थापा (१२८१, ९ मा धनबहादुर थापा (७४०), १० मा राजेन्द्र भट्टराइ क्षेत्री (९२५), ११ मा शालिकराम भट्टराइ (१०३८) र १२ मा इन्द्र गुरुङ (७५६) वडाध्यक्ष पदमा निर्वाचित भएका छन् ।
