व्यासगुफा परिसरमा एकमहिने महामिलन पर्व सुरु
दमौली : भगवान वेदव्यासको अवतरणभूमि दमौलीमा विश्व ओमकार हिन्दू महामिलन पर्व एवं श्रीमद्भागवत ज्ञानमहायज्ञ सुरु भएको छ । वेदानुयायी प्रतिष्ठान नेपाल केन्द्रीय समितिको आयोजनामा व्यासगुफा परिसरमा आजदेखि सुरु भएको महामिलन पर्व कात्तिक महिनाभर सञ्चालन गरिदैछ। महामिलन पर्वका अवसरमा शनिबार दमौली बजारमा सांस्कृतिक झाँकी निकालिएको थियो ।
यस वर्षको महामिलन पर्व दशौँ संस्करण रहेको समितिका अध्यक्ष कृष्णकान्त काफ्लेले जानकारी दिए। महामिलन पर्वकै अवसरमा कात्तिक ९ गतेदेखि श्रीमद्भागवत ज्ञान महायज्ञ सञ्चालन गरिने उनले बताए। मुलुकमा शान्ति कायम गर्न र लोकको कल्याण होस् भन्ने कामनासहित महायज्ञ सञ्चालन गरिने उनले बताए ।
एक महिनासम्म चल्ने महामिलन पर्वमा भने वेदहरुसँग सम्बन्धित विषयमा छलफल गरिनेछ । कात्तिक महिनाभर विद्वानहरुको उपस्थितिमा विविध विषयमा छलफल हुने उनले उल्लेख गरे। उनले भने, ‘महामिलन पर्वमा ओमकार परिवारसँग आबद्ध सबैलाई आमन्त्रण गरिएको छ ।’
व्यासभूमिको प्रचारप्रसार गर्दै धार्मिक गन्तव्यस्थल बनाउने उद्देश्यसहित हिन्दू महामिलन पर्व आयोजना गरिएको हो । व्यासभूमि दमौलीमा विसं २०७३ जेठ ५ गते स्थापित वेदानुयायी प्रतिष्ठान नेपालले धर्मको संरक्षण र संवर्द्धन गर्ने हेतुले व्यासको साधनाभूमि दमौलीमा दामोदर बाबाको संत्संकल्प र संरक्षकत्वमा १८ महिने अखण्ड हरिनाथ संकीर्तन सम्पन्न गरी प्रत्येक वर्ष कात्तिक महिनामा ओमकार हिन्दू महामिलन पर्व हुँदै आएको छ ।
महामिलन पर्वमा दैनिक भगवत्वपूजा अर्चना, रुद्राभिषेक, हवन, श्रीमद्भागवत पाठपारायण, भागवत रसमर्मज्ञ, विशिष्ट विद्वान तथा सन्तहरुको आध्यात्मिक प्रवचन, हरिनाम संकीर्तन, विभिन्न जातिका मौलिक संस्कार र संस्कृति झल्किने झाँकी प्रदर्शन गरिने आयोजकले जनाएको छ ।
काफ्लेले भने, “व्यास जन्मभूमिलाई विश्वसामु चिनाउने कार्यक्रमको मुख्य उद्देश्य हो । यसमा सबै संघसंस्था, व्यक्ति, पत्रकार, राजनीतिक दलको साथ र सहयोग आवश्यक पर्दछ ।” धार्मिक, सांस्कृतिक तथा पर्यटकीय हिसाबले महत्व बोकेको व्यासभूमि ओझेलमा परेकाले यसको प्रचारप्रसार गर्न आवश्यक रहेको जनाइएको छ ।
व्यासभूमिलाई विश्वभर परिचित गराउन र धार्मिक पर्यटनको विकास गर्ने उद्देश्यसहित व्यास क्षेत्र विकास कोषको सक्रियतामा १०८ फिट व्यासको मूर्तिका लागि आवश्यक पूर्वाधार निर्माण सुरु गरिए पनि सोचेअनुरुप काम भने अगाडि बढ्न सकिरहेको छैन ।
व्यासको जन्मभूमि दमौलीमा शिवपञ्चायन मन्दिर छ । मन्दिरको केही तलपट्टि व्यासगुफा छ । जहाँ बसेर व्यास ऋषिले चारवेद र अठार पुराणको रचना गरेको विश्वास गरिन्छ । व्यास गुफाको पारिपट्टि पराशर गुफा छ । पराशर गुफासम्म पुग्नका लागि मादी नदीमा झोलुङ्गे पुल निर्माण गरिएको छ। व्यासगुफासम्म घुम्न आएकाहरु पुल तरेर पराशर क्षेत्र पनि पुग्ने गरेका छन् ।
व्यासभूमिलाई अन्तर्राष्ट्रियस्तरसम्म परिचित गराउँदै धार्मिक गन्तव्य बनाउन विविध कार्यक्रम हुँदै आएको छ । विसं २०४१ सालमा योगी नरहरिनाथले कोटीहोम लगाउने सिलसिलामा भएको धर्मसभामा महर्षि वेदव्यासको अवतरण भूमि दमौलीस्थित शुक्लामाहेन्द्री संगम भएको बताए ।
