तनहुँका नौ पालिकाको कार्यपालिकाले पायो पूर्णता

तनहुँका १० स्थानीय तहमध्ये नौ स्थानीय तहका कार्यपालिकाले पूर्णता पाएको छ । स्थानीय तह निर्वाचन अन्तर्गत जिल्लाको व्यास नगरपालिका बहेक अन्य नौ पालिकाको कार्यपालिकाले पूर्णता पाएको हो । व्यास नगरपालिकाको कार्यपालिका चुनावका लागि विहीबार कार्यतालिका प्रकाशित गरिएको छ । मुख्य निर्वाचन अधिकृतको कार्यालयले कार्यपालिका सदस्य निर्वाचनका लागि कार्यतालिका प्रकाशित गरेको हो ।

तालिका अनुसार जेठ १९ गते उम्मेदवारको नामावली प्रकाशन, मतदाता नामावली सच्याउन वा छुट नाम समावेश गर्न दरखास्त दिने, संशोधित मतदाता नामावली प्रकाशित गरिनेछ । जेठ २० गते मतदाताको विरोधमा उजुरी दिने, उजुरी उपर जाँचबुझ गर्ने कार्यतालिका बनाइएको छ । यस्तै जेठ २१ गते मनोनयन र २५ गते मतदानको कार्यतालिका रहेको छ ।

नगरपालिकामा आठ जना कार्यपालिका सदस्य निर्वाचित र पाँच जना महिला वडा सदस्यबाट र तीन जना दलित/ अल्पसंख्यकबाट निर्वाचित हुने प्रावधान अनुसार कार्यपालिका सदस्य चयन गरिन्छ । व्यास नगरपालिकामा नेपाली कांग्रेसको बहुमत रहेकाले सबै कार्यपालिका सदस्य कांग्रेसबाटै निर्वाचित हुने निश्चित छ ।

यस्तै, शुक्लागण्डकीको कार्यापालिकामा एमाले प्यानलै विजय विजय भएको छ । बिहीबार भएको कार्यपालिका सदस्य निर्वाचनमा एमालेको प्यानल नै विजय भएको हो । महिला सदस्यमा डोलमाया गुरुङ, रिता नेपाली, शारदा लम्साल, सीतादेवी तिमिल्सिना, सुनित सुनार वि.क निर्वाचित भएका छन् । दलित अल्पसंख्यक तर्फ खिम बहादुर कुमाल, विमल जि.सी. (भुजेल) र सन्तोष वि.क. निर्वाचित भएका छन् । ६२ मत खसेकोमा निर्वाचित सबैले समान ३५ मत प्राप्त गरेका थिए ।

भानु नगरपालिकाको कार्यपालिका सदस्य पनि निर्वाचित भएका छन् । कार्यपालिकामा नेपाली कांग्रेसका सात र नेकपा (एकीकृत समाजवादी)का एक जना निर्वाचित भएका छन् । स्थानीय तह निर्वाचनमा सत्तारुढ दलबीच गठबन्धन नभए पनि कार्यपालिका सदस्यमा भने एकीकृत समाजवादीले पनि भाग पाएको छ ।

दलित/अल्पसंख्यकतर्फ एकीकृत समाजवादीबाट राजु सुर्खाली कार्यपालिका सदस्यमा निर्वाचित भएका छन् । कांग्रेसबाट रविन भुजेल र धनबहादुर विक निर्वाचित भएका छन् । निर्वाचित वडा सदस्यबाट महिलातर्फ वृन्दा रानाभाट, प्रविना थापा, सावित्रा सुनार, सकिना खातुन र शान्ता लम्साल निर्वाचित भएका छन् ।

भिमाद नगरपालिका, देवघाट गाउँपालिका, आँबुखैरेनी गाउँपालिका, बन्दीपुर गाउँपालिका, म्याग्दे गाउँपालिका, ऋषिङ गाउँपालिका, घिरिङ गाउँपालिकामा कार्यपालिकाले पूर्णता पाइसकेको छ । कार्यपालिकाले पूर्णता पाएकामध्ये भानु, देवघाट, म्याग्दे, ऋषिङमा कांग्रेसको बहुमत पुगेको छ भने बन्दिपुरमा कांग्रेस र नेकपा (माओवादी केन्द्र)को गठबन्धनको बहुमत पुगेको छ । भिमाद र घिरिङमा नेकपा (एमाले)को तथा आँबुखैरेनीमा नेकपा (माओवादी केन्द्र)को एकल बहुमत पुगेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर