वरिष्ठ नेता पौडेल गृह जिल्लामा “सुरक्षित” हुन खोज्दै !
सविन लामिछाने/तनहुँ
स्थानीय तहको निर्वाचनमा तनहुँमा सत्तारुढ दल नेकपा एकीकृत समाजवादी शून्य बन्यो । तनहुँका १० पालिकामध्ये भिमाद नगरपालिका र घिरिङ गाउँपालिकामा नेपाली कांगे्रससँग तालमेल गरेपनि नेकपा एमालेसँग पराजित हुन पुग्यो । अन्य पालिकामा पनि एकीकृत समाजवादीको प्रभाव देखिएन । धरौटीनै जफत हुने गरी पराजय भोग्नुपर्यो । जबकी एसले तनहुँबाट एकजना संघीय मन्त्री पाएको छ । पालिकामा शून्य हुन पुगेको एसलाई भानु नगरपालिका र व्यास नगरपालिकाको नगर कार्यपालिकामा नेपाली कांगे्रसले एक/एक सदस्यको स्थान दिएको छ ।
जिल्ला समन्वय समितिको निर्वाचनमा नेकपा माओवादीलाई चितबुझदो सिट दिएर आगामी प्रदेश र प्रतिनिधि सभा निर्वाचनका लागि नेपाली कांग्रेसले आफ्नो सिट सुरक्षित बनाउन खोजेको देखिन्छ । अघिल्लो पटक कांगे्रसको बहुमत पुगेको समन्वय समितिमा अहिले कुनै पनि पार्टीको बुहमत पुगेको छैन । यद्यपि जिससमा नेपाली कांग्रेसको भने निर्णायक भूमिका छ ।
जिल्ला समन्वयका लागि नेपाली कांगे्रस निर्णायक भएकाले उपप्रमुख र ३ जना सदस्य माओवादीले माग गरेको छ । नेकपा माओवादी जिल्ला अध्यक्ष राजेन्द्रकेशरी न्यौपाने कांगे्रसको मात्र समन्वय समिति बनाउन मत नपुग्ने र एमालेसँग आफूहरु मिल्न तयार नभएको बताउँछन् । ‘समानजनक हिसाबले नपाए लिने कुरा नै भएन, असारको पहिलो हप्तामा सबै टुंगिन्छ,’ उनले भने ।
नेपाली कांग्रेसका वरिष्ठ नेता रामचन्द्र पौडेल पछिल्लो समय तनहुँमा सक्रिय राजनीतिक गतिविधि बढाइरहेका छन् । यसको तात्पर्य नै आगामी निर्वाचनमा उनले आफ्नो बलियो उपस्थिति खोजिरहेको उनी निकट स्रोत बताउँछन् ।
लामो समय पार्टीलाई योगदान गरेका वरिष्ठ नेता रामचन्द्र पौडेललाई सर्वमान्य नेता बन्ने चाहाना छ । तर, समयअनुसार धार परिवर्तन र आफनै गृह जिल्लामा पार्टी भित्रको किचलोको कारण उनको राजनीतिक आधार कमजोर बन्दै गएको देखिन्छ ।
आफ्नै गृह जिल्लामा कमजोर बन्दै गएका पौडेल आगामी चुनावमा भने ‘सुरक्षित’ हुने दाउमा छन् । सत्तारुढ गठबन्धनलाई प्रतिनिधि सभासम्म लैजाने र आफू अबको प्रधानमन्त्री हुने उनको चाहना रहेको देखिन्छ । ‘उहाँ अबको प्रधानमन्त्री नै हो । क्षेत्र नं १ बाट उहाँ उठ्नुहुन्छ,’ तनहुँका ती कांगे्रस नेताले भने, ‘गठबन्धनलाई निरन्तरता दिने र आफू प्रधानमन्त्री हुने उहाँको चाहना हो ।’
गएको कांग्रेस महाधिवेशनमा पौडेलले पार्टीको सभापतिको दाबेदार रुपमा प्रस्तुत हुँदै आएका थिए । तर, पार्टी भित्रको आन्तरिक किचलो र आफ्नै समूहमा अलोकप्रिय बन्दै गएपछि उनी निष्कृय भए । महाअधिवेशनमा निष्कृय भएपनि उनले भित्रि रुपमा सभापति देउवालाई सहयोग गरेका थिए ।
स्थानीय तह निर्वाचन दौरान पनि नेता पौडेलले सत्तारुढ पाँच दलीय गठबन्धनकै वकालत गर्दै आए । जिल्लामै कमजोर हुँदा गएको पार्टी जिल्ला अधिवेसनमा पनि आफू निकट वैकुण्ठ न्यौपानेलाई जिल्ला सभापतिमा जिताउन सकेनन् । स्थानीय तहको निर्वाचनमा पनि व्यासको मेयरमा न्यौपानेलाई मुस्किलले जिताउन सके ।
उनको आफ्नै गृह पालिकामा आफू निकटलाई कांगे्रसबाट असन्तुष्ट बनेका गोविन्दराज जोशीका छोरा दीपकराज जोशीले कडा टक्कर दिँदा पौडेल झन् कमजोर बन्दै गएको प्रष्ट हुन्छ । आगामी प्रतिनिधि सभाको निर्वाचनमा गोविन्द राज जोशी एमालेसँगको तालमेलमा उठ्ने चर्चा चल्न थालेको छ ।
व्यासको मेयरमा आफ्नो छोरा दीपकले हार व्यहोरे पनि जिल्लामा आफूबिनाको काँगे्रस कमजोर रहेको जोशीको दाबी छ । अघिल्लो प्रतिनिधि सभाको निर्वाचनमा वरिष्ठ नेता पौडेल विरुद्ध बागी उम्मेदवारी दिएको भन्दै उनलाई पाँच वर्षका लागि पार्टीको साधारण सदस्य समेत नरहने गरी कारवाही गरिएको छ ।
वरिष्ठ नेता पौडेलसँग अघिल्लो निर्वाचनमा आमनेसामने नभए पनि यसपटक भने ‘जम्काभेट’ हुने निश्चितप्रायः छ । अघिल्लो पटक जोशीले तत्कालीन नेकपा एमालेबाट उठेका कृष्णकुमार श्रेष्ठ ‘किसान’लाई सघाएका थिए । एमालेबाट चुनाव जितेका किसान हाल नेकपा एकीकृत समाजवादीमा छन् ।
