पहरो काटेर अवरुद्ध पृथ्वीराजमार्ग सूचारु गर्ने प्रयास, बेलुका ७ बजेबाट आँवुखैरेनी खण्ड बन्द (तस्विर र भिडियो सहित)

भञ्ज्याङ न्यूज

२७ जेष्ठ २०७९, शुक्रबार १९:२६

तनहुँको आँवुखैरेनी-४ साँखर स्थित मर्स्याङ्दी विद्युतगृह नजिकै पृथ्वीराजमार्ग भासिएपछि अवरुद्ध यातायात सुचारु गर्ने प्रयास भइरहेको छ । शुक्रबार बिहान करिब ४ बजेको समयमा सडक भाँसिएपछि आंशिक रुपमा साना सवारी साधानलाई वारपार गरिएपनि ठूला सवारी साधान पूर्णरुपमा अवरुद्ध भएका छन् ।

उक्त स्थानबाट यातायात सुचारु गराउनका लागि सडक छेउको पहरो काट्न सुरु गरिएको छ । निरन्तर वर्षाका कारण राजमार्ग भासिएपछि दुर्इतर्फी सडक सञ्चालनमा समस्या देखिएको छ ।

करिब दुइ फिट पहरो काटेर साना सवारी साधान र पैदलयात्रीलाई वारपार गराउने कार्य भएको सुरक्षा व्यवस्थामा खट्टएिका प्रहरी निरीक्षक हरि बहादुर क्षेत्रीले बताए ।

सडक भासिएसंगै बा१०च ४६७९ नम्बरको कार, ग३३प १०८१ नम्बरको मोटरसाइकल र बा१५प २९५३ नम्बरको स्कुटर मर्स्याङ्दी नदिमा खस्दा दुइ जनाको शव भेटिएको छ । भेटिएको शव मध्ये स्कुटर चालक गोरखा छोप्राक घर भई हाल आँबुखैरेनी गाउँपालिका-२ बस्दै आएका ३५ वर्षीय केशव घिमिरे र कार चालक हेटौंडा घर भएका ३३ वर्षीय हेम बहादुर भुजेल रहेका छन् । मोटरसाइकल चालक भने सकुसल भेटिएको प्रहरी निरीक्षक क्षेत्रीले बताए ।

सडक भासिएपछि अवरुद्ध पृथ्वीराजमार्गलाई खुलाउन सडक डिभिजन तथा अन्य सरोकारवाला निकायका प्राविधिकहरु खट्टएिका छन् । साना सवारी साधान र पैदलयात्रुलाई एकतर्फि रुपमा वारपार गर्ने व्यवस्था मिलाइएपनि ठूला सवारी साधान अझै केही दिन सञ्चालन गर्न सकिने अवस्था नभएको सहायक प्रमुख जिल्ला अधिकारी काशीराम गैरेले बताए ।

सडक भाँसिएको क्षेत्रमा वैकल्पिक मार्ग नभएकाले यात्रुहरू मर्कामा परेका छन् । सडक सुचारु गराउनका लागि प्राविधिकहरुले अध्ययन गरी पहरो काट्ने काम सुरु गरिएको छ । प्राविधिक जाँच गरी पहरो कटान कार्य अगाडि बढाइएको हुँदा दुइ तीन दिनमा ठूला सवारी साधन पनि सञ्चालन गर्ने गरी काम अगाडि बढाइएको सहायक प्रमुख जिल्ला अधिकारी गैरेले बताए ।

यस्तै, सडक भासिएपछि बिरामीलाई हेलिकोप्टरबाट काठमाडौं लगिएको छ । गोरखाको बारपाकका एक बिरामीलाई हेलिकोप्टरबाट उपचारका लागि काठमाडौं लगिएको हो । उच्च रक्तचापका बिरामी ५२ वर्षीय बालशम्सेर गुरुङलाई दमौली ल्याई दमौलीबाट एयर डाइनेष्टीकको हेलिकोप्टरबाट काठमाडौं लगिएको छ ।

राजमार्ग भासिएपछि आँबुखैरेनी हुँदै चितवन, काठमाडौं जाने र पोखरातर्फआउने सवारीसाधन रोकिएका छन् । साना सवारी साधान र र्सवसाधारणलाई भने सुरक्षितरूपमा वारपार गराउने व्यवस्था मिलाइएको छ ।

आँबुखैरेनी खण्ड बेलुका ७ बजेबाट बन्द

यस्तै, पृथ्वीराजमार्ग अन्तर्गत तनहुँको आँबुखैरेनी-मुग्लिन खण्ड आज बेलुका ७ बजेदेखि बन्द गरिने भएको छ । भासिएको सडकखण्ड मर्मतका लागि बेलुका ७ बजेदेखि भोली बिहान ५ बजेसम्म बन्द गर्न लागिएको हो ।

आज बिहान सडक भासिएपछि उक्त ठाउँमा साना सवारीसाधन मात्रै सञ्चालन भइरहेका छन् । सडक भासिएको ठाउँमा भित्तापट्टी सडक खन्न थालिएको छ । डेढ/दुइ मिटर भित्ता खनेर सडक सुचारु गर्न काम भइरहेको सडक डिभिजन कार्यालय दमौलीका प्रमुख लक्ष्मी केसीले जानकारी दिइन् ।

‘रातीको समयमा सवारी सञ्चालनमा जोखिम हुने भएकाले सडक बन्द गरेर भित्ता खन्ने कार्यलाई निरन्तरता दिनले उनले बताइन् । सडक भासिएपछि बिहानैदेखि अलपत्र र्सवसाधारणलाई पैदल हुँदै वारपार गराइएको छ । साना सवारी साधनपनि समय-समयमा सञ्चालनको व्यवस्था मिलाइएको छ ।

यसैबीच गण्डकी प्रदेशका आन्तरिक मामिलामन्त्री डोवाटे विकले उक्त खण्डको आजै निरीक्षण गरेका छन् । निरीक्षणका क्रममा मन्त्री विकले छिटो काम सकेर यातायात सञ्चालनमा सहजता ल्याउन निर्देशन दिएका छन् ।