माओवादी केन्द्र तनहुँका संयोजकको पदस्थापन, तनहुँको १ संघ र २ प्रदेशमा माओवादीको दावी

नेकपा (माओवादी) केन्द्र तनहुँका संयोजक ओमराज आले (मदन)ले बुधबार पदस्थापन गरेका छन् । बुधबार पार्टी कार्यालयमा एक कार्यक्रमको आयोजना गरी पदस्थापन गराइको छ ।

पार्टीका निवर्तमान संयोजक राजेन्द्रकेशरी न्यौपानेले आलेलाई माइन्युट हस्तान्तरण गरी पदस्थापन गराएका थिए । पदस्थापन पश्चात संयोजक आलेले पार्टीलाई नयाँ ढंगबाट अगाडी बढाउने बताए ।

‘सबैको सहयोग र सल्लाह अनुसार काम गर्र्छौ, पार्टीलाई नयाँ उचाइमा पुर्‍याउने संकल्प लिएका छौ’, उनले भने, ‘स्थानीय तहको निर्वाचन सकिएको र मंसिर ४ गते हुने निर्वाचनका लागि पनि छलफल गरेर अगाडि बढ्छौं ।

कार्यक्रममा नेकपा माओवादी केन्द्रका केन्द्रीय सदस्य हरिबहादुर चुमान, आशा कोइराला, ओमकुमारी पौडेल लगायतले पार्टीका आन्तरिक गतिविधिका विषयमा चर्चा गर्दै पार्टीलाई मजवुद ढंगले अगाडि बढाउन लागि पर्ने आग्रह गरेका थिए । त्यस्तै, नेकपा माओवादी केन्द्रले तनहुँको १ संघ र दुइ प्रदेशमा दावी गर्ने भएको छ । मंसिर ४ गते हुने निर्वाचनका लागि माओवादी केन्द्रले केन्द्र र प्रदेशमा गरी ५० प्रतिशत हिस्सा माग गर्ने निर्णय गरेको हो ।

माओवादी केन्द्र तनहुँको बुधबार दमौलीमा सम्पन्न बैठकले गठबन्धन गर्दा पचास प्रतिशत हिस्सा लिएर मात्र गठबन्धन गर्ने र त्यसका लागि सम्पूर्ण पार्टी पंक्ति परिचालन गर्ने निर्णय गरेको व्यास नगर कमिटीका अध्यक्ष रामचन्द्र सापकोटाले बताए ।

२०७४ सालको निर्वाचनमा एमाले र माओवादीको तालमेलका माओवादीले दुइ प्रदेशसभा क्षेत्र लिएको थियो । नेपाली कांग्रेसले आफ्नै उम्मेदवारको व्यवस्थापन गर्न नसकिरहेका बेला माओवादीको यो दावीले तनहुँको राजनीति थप पेचिलो बनाउने संकेत गरेको छ ।

यस्तै, पार्टीको जिल्ला सचिवमा शुक्र चुमानलाई चयन गरिएको छ । आँवुखैरेनी गाउँपालिकाका अध्यक्ष समेत रहेका चुमानलाई बुधबार बसेको बैठकले सचितमा चयन गरेको हो । बैठकले माओवादी केन्द्र तनहुँ १ नम्बर क्षेत्रीय कमिटीको संयोजकमा दिपक पन्त र २ को संयोजकमा मुक्ति सिग्देललाई चयन गरेको छ । बैठकले भदौ १८ गतेभित्र प्रतिनिधिसभा र प्रदेशसभा क्षेत्रीय कमिटीले सिफारिस गरी पठाएका उम्मेदवारको नामावली प्रदेश कमिटीमा पठाउने निर्णय गरेको बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर