घुम्ति शिविरबाट म्याग्देले ८२५ जना ज्येष्ठ नागरिकलाई परिचयपत्र वितरण गर्यो
भञ्ज्याङ न्यूज
तनहुँको म्याग्दे गाउँपालिकाले एकीकृत घुम्ति शिविर सञ्चालन गरी ८२५ जना ज्येष्ठ नागरिकलाई परिचयपत्र वितरण गरेको छ । गाउँपालिकाले शिविरबाटै १० जना अपाङ्ता भएका व्यक्तिलाई परिपचपत्र वितरण गरेको छ ।
गाउँपालिकाको वडा नं. ७ को स्वामीभञ्याङ्गबाट आइतबार दोश्रो चरणको एकीकृत घुम्ति शिविर सञ्चालन गरेको छ । शिविरको पहिलो दिन ३० जना ज्येष्ठ नागरिकलाई र २ जना अपाङ्गता भएकालाई परिचयपत्र वितरण गरिएको छ ।
अपाङ्गता परिचयपत्र प्राप्त गरेका स्वामिभञ्याङ्ग निवासी ५३ वर्षीया देउमाया भुजेलले गाउँपालिका र वडासम्म गएर सेवा लिन अर्समथ भएको अवस्थामा घरमा नै आएर परिचयपत्र पाउँदा खुशी व्यक्त गरिन् । भुजेललाई गाउँपालिका अध्यक्ष श्रीप्रसाद श्रेष्ठ, उपाध्यक्ष वालकृष्ण घिमिरे, प्रमुख प्रशासकीय अधिकृत नारायण प्रसाद अधिकारीले संयुक्त रुपमा परिचयपत्र उपलब्ध गराएका थिए ।
यस्तै, स्थानीय राम बहादुर थापाले गाउँपालिकाले टोल र घरसम्म आएर नै ज्येष्ठ नागरिक परिचयपत्र सहज रुपमा उपलब्ध गराउँदा खुशी लागेको बताए । वडाकार्यलय टाढा पर्ने र वृद्धअवस्थामा हिडेर जान नसक्ने भएको हुँदा यो शिविरले धेरै ठूलो राहत दिएको बताए ।
शिविरमा महिला स्वास्थ्य सेवा अन्तर्गत महिलाहरुको पाठेघर परीक्षण र देखापरेका स्वास्थ्य समस्याको उपचार, व्यवस्थापन परीक्षण एवं परामर्श सेवा उपलब्ध गराइएको छ । परिवार नियोजन परामर्श सेवा, कोभिड-१९ विरुद्धको पहिलो, दोश्रो र अतिरिक्त मात्रा खोप सेवा, आयुर्वेद सेवा, स्वास्थ्य विमा सेवा घुम्ति शिविरबाट उपलव्ध गराइएको छ ।
गाउँपालिकाले घुम्ति शिविरबाट वहिरङ्ग सेवा अन्तर्गत विरामीहरुको स्वास्थ्य परीक्षण, उपचार तथा औषधी वितरण गरिएको छ । प्रयोगशाला सेवा अन्तर्गत रगतमा ग्लुकोजको परीक्षण, खकार परीक्षणका लागि नमुना संकलन, औलोरोगको परीक्षण लगायतका सेवा उपलब्ध गराइएको छ ।
जन्म, मृत्यृ, वसाइसराइ एवं सम्वन्ध विच्छेदका दर्ताका साथै प्रशासन शाखा अर्न्तर्गत व्यवसाय दर्ता, राजश्व संकलन, मालपोत तथा भुमिकर संकलन तथा विभिन्न सिफारिश सेवा उपलब्ध गराइएको गाउँपालिकाका प्रमुख प्रशाशकीय अधिकृत अधिकारीले बताए ।
गाउँपालिकाले शिविरबाट विउविजन वितरण एवं कृषि अनुदान माग संकलन, पशु सेवा शाखा अन्तर्गत गोवर परीक्षण र नतिजाको आधारमा पशुपंक्षिलाई औषधी वितरण, वाख्रा, पाठा एवं वहर वन्ध्याकरण, विरामी पशुको उपचार व्यवस्थापन, योजना शाखा अर्न्तर्गत उपभोक्तासँग योजना सम्झौता लगायतका सेवा प्रवाह गरिएको छ ।
शिविरमा गाउँपालिका अध्यक्ष श्रीप्रसाद श्रेष्ठ, उपाध्यक्ष वालकृष्ण घिमिरे प्रमुख प्रशाशकीय अधिकृत, वडाध्यक्ष, कार्यपालिका सदस्य, वडासदस्यहरुको सहभागिता रहेको थियो । गाउँपालिकाले कातिक ४ गतेसम्म वडा नं. ५, ६ र ७ मा घुम्ति शिविर सञ्चालन गर्ने भएको छ ।
