डुम्रे बचत तथा ऋण सहकारीको साधारण सभा सम्पन्न
भञ्ज्याङ समाचारदाता/डुम्रे
तनहुँको बन्दिपुर गाउँपालिका-१ डुम्रे स्थित डुमे बचत तथा ऋण सहकारीले १६औं वार्षिक साधारण सभा सम्पन्न गरेको छ । संस्थाका अध्यक्ष राम कुमार पियाको सभापतित्वमा आयोजित सभाको संस्थाका ज्येष्ठ नागरिक एवं संस्थापक शेयर सदस्य अजप नारायण पियाले उद्घाटन गरेका थिए ।
सभामा संस्थाका कोषाध्यक्ष शम्शेर बहादुर गुरुङले यस आर्थिक वर्षमा शेयर पुँजी २ करोड ८७ लाख ९९ हजार ५०० रुपैयाँ पुर्याइ १५ करोड ८७ लाख ९५ हजार ७२५ रुपैयाँ को व्यालेन्ससिटमा ६३ लाख ६ लाख ३२८ मुनाफा गरेको जानकारी गराए ।
यस्तै, सहकारीले आगामी वर्ष १६ करोड ८२ लाख ८५ हजार ४६५ रुपैयाँ व्यालेन्ससिट पुर्याउने लक्ष्य लिएको कोषाध्यक्ष गुरुङले आर्थिक प्रतिवेदन प्रस्तुत गरेका थिए । संस्थाका सचिव राज कपुर पियाले चालु आर्थिक वर्षमा संस्थाको आन्तरिक ऋण नीति अनुसार मृतक चार जना सदस्यलाई आन्तरिक बिमा कोष बाट २ लाख २६ हजार ६० रुपैयाँ ऋण मिनाहा दिएको जानकारी गराएका थिए ।
कार्यक्रममा कार्यसमिति सदस्य कृष्ण पिया र कानुनी सल्लाहाकार ऋषिराम अधिकारी लगायतले शुभकामना मन्तव्य व्यक्त गरेको संस्थाका कार्यालय प्रमुख अच्युत सुवेदीले जानकारी गराए ।
प्रमुख सुवेदीका अनुसार द्वन्द्वकालपछि स्थापित डुम्रे बजारको जेठो यो सहकारी संस्था मार्फत समाजको आर्थिक बिकास, आर्थिक शुशासन र सहभागीता निरन्तर प्रभावकारी गर्दै कारोवार बृद्धि गर्दै अगाडि बढेको छ । सहकारीको मुल्य, मान्यता र सिद्धान्तलाई आत्मसाथ गर्दै नेपाल सरकारले जारी गरेको ऐन नियम पालनामा संस्था कटिबद्ध रहेको पनि उनले बताए ।
