तनहुँको शुक्लागण्डकीमा विभत्स रुपमा हत्या गरिएका दुई पुरुष र एक महिलाको शव भेटियो
तनहुँ : तनहुँको शुक्लागण्डकी नगरपालिकामा शनिबार विभत्स रुपमा हत्या गरिएका तीन शव भेटिएका छन् । शुक्लागण्डकी नगरपालिका–५ स्थित कसेरीमा दुई पुरुष र एक महिलाको शव भेटिएको जिल्ला प्रहरी कार्यालय तनहुँले जनाएको छ ।
कसेरीघाटमा निर्माणाधिन फोहोरमैला प्रशोधन केन्द्रमाको कम्पाउण्ड बाहिर दुई जना पुरुष र सो घटनास्थलको केही पर एक महिलाको शव भेटिएको जिल्ला प्रहरी कार्यालय तनहुँका प्रमुख प्रहरी उपरीक्षक टेकबहादुर कार्कीले जानकारी गराए ।
उक्त घटनामा एक पुरुषको शव शुक्लागण्डकी नगरपालिका–११ पाल्पालीछाप राइपुरका अन्दाजी ३९ वर्षीय नारायण विका रहेका र उनि उक्त केन्द्रमा गार्डको रुपमा कम गर्दै आएको बताइएको छ ।
यस्तै, एक पुरुष र महिलाको शवको भने पहिचान खुल्न सकेको छैन । उनिहरु श्रीमान श्रीमती रहेको र प्रशोधन केन्द्र बाहिर टहरा बनाई संगै बस्दै आएको बताइएको प्रहरी उपरीक्षक कार्कीले जानकारी दिए ।
ती महिला पुरुषले शुक्लागण्डकी नगरपालिकाको बजार क्षेत्रबाट संकलन गरिएको फोहोरमैलाबाट कवाडी संकलन गर्ने गरेको स्थानीयले बताएका छन् ।
मृत फेला परेका तीन जनाको शव विभत्स रहेको घटनास्थल पुगेका स्थानीयले जनाएका छन् । पुरुषको शवको पेटमा गम्भिर चोट लागेको अवस्थामा र महिलाको शव घाँटी रेटिएको अवस्थामा भेटिएको बताइएको छ ।
यस्तै, इलाका प्रहरी कार्यालय बेलचौताराका प्रमुख प्रहरी निरीक्षक धननारायण श्रेष्ठका अनुसार घटनाको प्रकृति शंकास्पद भएकाले जिल्ला प्रहरी कार्यालय तनहुँका प्रमुख प्रहरी उपरीक्षक टेकबहादुर कार्कीसहितको टोली घटनास्थलमै खट्टिएर सबै कोणबाट अनुसन्धान गरिरहेको छ ।
गण्डकी प्रदेशको प्राविधिक टोली र तालिम प्राप्त कुकुर सहितको प्रहरी टोलीले अनुसन्धान गरिरहेको उनले बताए । तीनै जनाको शवलाई पोस्टमार्टमका लागि प्रादेशिक अस्पताल दमौली ल्याइएको छ ।
