तनहुँको दमौलीमा सडक दौड प्रतियोगिता
भञ्ज्याङ समाचारदाता/दमौली
जिल्ला खेलकुद विकास समिति तनहुँले आइतबार आयोजना गरेको सडक दौड प्रतियोगितामा पुरुषतर्फको उपाधि सहास पन्थले जितेका छन् । व्यास नगरपालिका-३ स्थित अनसनचौतारीदेखि व्यास नगरपालिका-१४ छाब्दीसम्मको सात किलोमिटर दूरी पार गर्दै पन्थले उपाधि जितेका हुन् । पुरुषतर्फ सनम गुरुङ द्वितीय र साजन थापा तृतीय भएका छन् ।
महिलातर्फ सुस्मिता रानाभाट प्रथम, नम्रता गुरुङ द्वितीय र रश्मी रानाभाट तृतीय भएका छन् । पुरुषतर्फ ३४ र महिलातर्फ १५ धावकको सहभागिता थियो । पुरुषतर्फ प्रथम, द्वितीय र तृतीय हुनेलाई क्रमशः रु आठ हजार, रु पाँच हजार र रु तीन हजार नगद पुरस्कार प्रदान गरिएको छ ।
महिलातर्फ प्रथम, द्वितीय र तृतीय हुनेलाई क्रमशः रु पाँच हजार, रु तीन हजार र रु दुइ हजार नगद पुरस्कार प्रदान गरिएको समितिका अध्यक्ष अनिल पाण्डेले बताए । खेलबाट पर्यटन प्रबर्द्धन गर्नुका साथै खेलकुदमा युवाहरुको आकर्षण बढाउने उद्देश्यसहित दौड प्रतियोगिता आयोजना गरिएको पाण्डेले बताए ।
यसअघि प्रतियोगिताको उद्घाटन गर्दै व्यास नगरपालिकाका प्रमुख वैकुण्ठ न्यौपानेले खेलमार्फत् पर्यटकीय स्थलको प्रचारप्रसारमा नगरपालिका पनि लागिपरेको बताए । उनले नगरपालिकाले प्रत्येक वर्ष सहिद दिवसको अवसरमा मानुङदेखि पुलिमराङसम्म अल्ट्रा म्याराथन गर्दै आएको बताए ।
