चौतारो निर्माणमा जुटे गुणादीका दिदीबहिनी

तनहुँको म्याग्दे गाउँपालिका-१ स्थित गुणादीमा रहेको मिलीजुली दिदीबहिनी समूहको सक्रियतामा व्यवस्थित चौतारो निर्माण गर्न लागिएको छ । गाउँघरतीर मेलापात, घाँस, दाउरा, गोठालो गर्दा थकाइ मार्ने र गर्मी समयमा शीतलता लिने चौतारा पछिल्लो समय नासिँदै जान थालेपछि संरक्षण गर्न जुटेका हुन् ।

विकास निर्माणका क्रममा बाटो र सडक छेउमा रहेका चौतारा ढालिने हुँदा यस्ता सम्पदाको अस्तित्व सङ्कटमा पर्दै गएकाले संरक्षणमा जुटेको समूहकी अध्यक्ष हिमा पौडेल खनालले जानकारी दिनुभयो । नारी दिवसको अवसर पारेर गत बुधबार ज्येष्ठ नागरिक देवीलाल खनालले चौतारो निर्माणको शिलान्यास गरेका छन् ।

पुर्ख्यौली सम्पदाका रुपमा रहेको पाटी, पौवा, कुवा र चौतारो लगायतका उचित संरक्षणको अभावमा हराउँदै जान थालेकाले यसको संरक्षण गर्न कस्सिएको पौडेलको भनाइ छ । भावि पुस्तालाई पाटी, पौवा, कुवा र चौतारा लगायतका विषयमा चिनाउन र जानकारी गराउन पनि कठिनाइ हुने खतरा देखिएको समूहका दिदीबहिनी एकजुट भएर अघि बढेको उनले बताए ।

उनले भने, ‘म्याग्दे गाउँपालिकाबाट रु दुइ लाख ६५ हजार र दिदीबहिनी समूहबाट रु एक लाख ७७ हजार गरी कूल रु चार लाख ४२ हजारको लागतमा निर्माण गर्न लागेको हौ ।’ चौतारा संरक्षण, रेखदेख तथा सरसफाइ आलोपालो गर्ने सहमति भएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर