व्यास नगरपालिकामा १३ करोड लागतमा जग्गा एकीकरण आयोजना

तनहुँको व्यास नगरपालिका जग्गा एकीकरण आयोजना अगाडि बढाएको छ । वडा नं. १० को बैरेनीमा १३ करोड रुपैयाँको लागतमा जग्गा एकीकरण आयोजना अगाडि बढाएको हो ।

नगरपालिकाले बिहीबार भूमि पुजन गरी उक्त आयोजनाको सुरुवात गरेको छ । नगरप्रमुख बैकुण्ठ न्यौपानेले एक कार्यक्रमका बीच भूमि पुजन गरेपछि आयोजनाको निर्माण प्रक्रिया अघि बढाइएको हो ।

आयोजनाको पहिलो चरणमा करिब २६१ रोपनी क्षेत्रफलमा आयोजनाको निर्माण कार्य शुरु गरिने भएको छ । नगर विकास कोषबाट ७० प्रतिशत र ३० प्रतिशत नगरपालिकाले बेहोर्ने गरी आयोजना संचालन गर्न लागेको बैरेनी जग्गा एकीकरण आयोजना प्रमुख रबिन्द्र लाल मूलले बताए । उनका अनुसार आयोजनाको अनुमानित लागत १३ करोड ७२ हजार १६५ रुपैयाँ छ ।

कूल ३५१ कित्ता र २५० जना लाभग्राही रहने बैरेनी जग्गा एकीकरण आयोजनाको ऋण जग्गाधनीहरुले पूर्वाधार निर्माणका लागि गरेको योगदानबाट छुट्टाइएको सेल्स प्लट बिक्री गरी चुक्ता गरिने बताइएको छ ।

आयोजना कार्यान्वयनका लागि आयोजनाको मस्यौदा योजना तयार गरी शहरी विकास मन्त्रालयमा पेश गरिएकोमा नेपाल सरकारबाट स्वीकृत भई फागुन २ गतेको राजपत्रमा प्रकाशित भएपछि प्रक्रिया अघि बढाइएको बताइएको छ ।

जग्गा एकीकरण आयोजना व्यवस्थित शहरी विकासका लागि व्यास नगरपालिकाद्वारा २०७७ माघ महिनामा भूकम्प प्रविधि राष्ट्रिय समाज नेपाल -एनसेट)को प्राविधिक सहयोगमा संचालन गर्ने निर्णय अनुरुप गण्डकी प्रदेशमै पहिलो पटक प्रारम्भ गरिएको नगरप्रमुख बैकुण्ठ न्यौपानले बताए ।

आयोजनाको हाल कार्यान्वय चरणमा प्रवेश गरेको हुँदा आयोजनाको सम्पन्नको लागि भूमि पुजन कार्यक्रम आयोजना गरिएको नगरप्रमुख न्यौपानेले बताए । हाल आयोजनाको प्रारम्भिक चरणको जग्गा सम्याउने तथा रिटेनिंग वाल निर्माण गर्ने कार्यका लागि ठेकेदार छनोट भई निर्माण कार्य सुरु गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर