संयुक्त उद्योगी, व्यवसायी तथा कृषक संघको दोश्रो चरणको आन्दोलन

संयुक्त उद्योगी, व्यवसायी तथा कृषक संघ तनहुँले दोस्रो चरणको आन्दोलनका कार्यक्रम सार्वजनिक गरेको छ । संघले शनिबार दमौलीमा पत्रकार सम्मेलन गरी अबको दोश्रो चरणको आन्दोलन बैंकिंग सामन्तवादका विरुद्ध गर्ने तयारी भएको जनाएको छ ।

स-प्रमाण ठाउँका ठाउँ मुकाबिला गर्दै समाधान निकाल्न आन्दोलन केन्द्रित हुने संघका अध्यक्ष लक्ष्मीभक्त खनालले बताए। उनले भने, ‘असार ३ र ४ गते भित्र आवश्यक पर्ने व्यवसायीहरुले पुनर्कर्जा, पुनर्तालिकिकरण, पुनसंरचना र आंशिक धितो फुकुवाका लागि आ-आफ्नो बैंकमा लिखित निवेदन दिने, असार ५ देखि ९ गतेसम्म निवेदन माग स्वीकृत वा अस्वीकृत गरेको लिखित जवाफ पठाउने गृहकार्यको लागि बैंकलाई समय दिने र असार १० देखि १५ गते सम्ममा सच्चिन नचाहने बैंक र नियामक निकायलाई सच्चाउन संघर्षमा उत्रिने कार्यक्रम रहेको छ ।’

शान्तिपूर्ण शुद्ध व्यावसायिक आन्दोलनका मागलाई वेवास्ता गर्दा निम्तिन सक्ने कुनै पनि अप्रिय घटनाको जिम्मेवारी सम्बन्धित बैंक तथा वित्तीय संस्था र तिनलाई छाडा छोड्ने नियमनकारी राज्य संयन्त्रले नै लिनुपर्ने संघका अध्यक्ष खनालले बताए ।

नेपाली उद्योगी, व्यवसायी र कृषकहरुले कोभिड-१९ का सबै लहरहरु पार गरी हालसम्म आइपुग्दा आर्थिक मन्दी र बैंकिङ्ग सामन्तबादको गम्भीर सिकार हुनुपरेको तितो यथार्थ घाम जत्तिकै र्छलङ्ग भएको संघका संयोजक गिर बहादुर (मित्र) दुराले बताए ।

उनले भने, ‘परिणाम स्वरूप देशभर घटेका आत्मदाह र आत्महत्याका श्रृंखला प्रति पनि संचार जगत अनभिज्ञ छैन । व्यववसायी र बैंक दुबैलाई बचाउने भन्दा व्यवसायीलाई माने र बैंकलाई अझ मोटाउने गरी मौद्रिक नीति आएको र यसका लागि सरकारनै लागि परेको छ ।’