नियमविपरित सञ्चालित दमौलीका आयुर्वेद पसलमा व्यासले लगायो ताला
भञ्ज्याङ न्यूज
तनहुँको दमौलीमा नियमविपरित सञ्चालित आयुर्वेद पसलहरुमा व्यास नगरपालिकाले ताला लगाएको छ । नगरपालिकाले दमौलीमा रहेका आयुर्वेद पसलहरुमा मंगलबार अनुगमन गर्दा नियमविपरित ओपिडि सहित सञ्चालित सात वटा पसलहरुमा ताला लगाई सिल गरेको हो ।
अनुगमनको क्रममा व्यास-२ स्थित रुक्शल आयुर्वेद फर्माले स्थानीय तहमा दर्ता नगरेको र औषधी पसल दर्ता गरी बिरामी परीक्षण गर्ने गरेको पाईएपछि सिल गरिएको प्रमुख प्रशासकीय अधिकृत गंगालाल सुवेदीले बताए ।
त्यस्तै आरोग्य फार्मेसीले स्थानीय तहमा दर्ता नगरेको, एलोपेथि र होमोपेथि औषधी दुबै बिक्री गरेको, औषधी खुल्ला रूपमा भेटिएको, फार्मेसी मापदण्ड बिपरित सञ्चालनमा रहेको पाईएपछि सिल गरिएको उनले बताए ।
व्यास-२ गणेशमान चोकमा रहेको अनमोल आयुर्वेद स्वास्थ्य क्लिनिकले नविकरण नगरेको, क्लिनिक मापदण्ड अनुसार नरहेको र एलोपेथि औषधी बिक्री गर्ने गरेको पाईएको स्वास्थ्य शाखा प्रमुख प्रमोद सोतीले बताए । उनका अनुसार उक्त क्लिनिकलाई सिल गरी फार्मेसी मात्र संचालन गर्न दिईएको छ भने एक सातामा पसल नविकरण गर्न निर्देशन दिईएको छ।
व्यास होमियो फार्मेसीमा होमियो फार्मेसी दर्ता भएकोमा क्लिनिक तथा प्रयोगशाला समेत सञ्चालन भएको, ल्याव र क्लिनिक सञ्चालन दर्ता नभएको पाईएको छ । उक्त ल्याब र ओपिडिलाई पनि सिल गरिएको प्रमुख सोतीले बताए ।
आयुष होमियो फर्मामा होमियोप्याथि पसल दर्ता चलानी नै नभएको, म्याद सकिएको औषधी फेला परेको, औषधी पसल दर्ता गरी क्लिनिकको रूपमा सञ्चालन गरेको भेटिएपछि उक्त पसल पनि सिल गरिएको छ ।
यस्तै, व्यास-२ सत्यवति माध्यमिक विद्यालय अगाडी रहेको स्पार्क दमौली अस्पताल स्थानीय तहमा दर्ता नै नभई संचालनमा गरिएको हुँदा सिल गरिएको छ ।
प्रकाश आयुर्वेदिकले आयुर्वेद पसलमा दर्ता गरी एलोपेथि औषधी बिक्री गर्ने गरेको, औषधी पसलमा क्लिनिकको सेवा सञ्चालन गरेको र चिकित्सक बिना अनाधिकृत व्यक्तिले बिरामी परीक्षण गरेको भेटिएको व्यासका जनस्वास्थ्य निरिक्षक लक्ष्मी गुरुङले बताईन् । उनको अनुसार उक्त पसलबाट एलोपेथि औषधी बरामद गरी सिल गरिएको छ ।
सहायक प्रमुख जिल्ला अधिकारी काशिराम गैह्रैको संयोजत्वमा गरिएको अनुगमनमा जिल्ला आयुर्वेद कार्यालयका आयुर्वेद चिकित्सक रामप्रमोद मण्डल लगायतको टोली अनुगमनमा खट्टएिको थियो ।
