व्यास नगरपालिकाले दमौलीमा सञ्चालनमा ल्यायो “बुधबारे कृषि हाटबजार”

तनहुँको व्यास नगरपालिकाले बुधबारे कृषि हाटबजार सञ्चालनमा ल्याएको छ । संविधान दिवस २०८० को अवसर पारेर बुधबारबाट नगरपालिकाले पुनः हाटबजार सञ्चालनमा ल्याएको हो ।

दमौली स्थित गणेशमानचोकमा करिब दुइ दशक अगाडि सञ्चालन हुँदै आएको हाटबजार बन्द भएपछि नगरपालिकाले पुनः सञ्चालनमा ल्याउने निर्णय कार्यपालिका बैठकले गरेको थियो । करिब दुइ दशक अगाडि दमौलीमा हाटबजार सञ्चालन हुन्थ्यो, जहाँ उपभोक्ताले गाउँबाट ल्याइएका कृषि सामग्री खरिद गर्न पाउँथे । यसले गर्दा किसान तथा उपभोक्ताको सिधा सम्पर्क हुन्थ्यो र किसानले उचित मूल्य पाउँथे । पछि हाटबजार लगाउने प्रचलन हराएपनि कृषक र उपभोक्ताको सिधा सम्पर्क टुट्दै आएको थियो ।

लोप भइसकेको हाटबजारलाई व्यास नगरपालिकाले संविधान दिवसको अवसर पारेर व्यास-३ मा बुधबारे हाटबजार सञ्चालन गरिएको छ । उक्त हाटबजार अब प्रत्येक बुधबार लाग्नेछ । किसान र उपभोक्ताबीच सिधा सम्पर्क गराएर कृषि सामग्री खरिद-बिक्री गर्ने व्यवस्था मिलाउन हाटबजार सञ्चालनमा ल्याइएको नगर प्रमुख वैकुण्ठ न्यौपानेले बताए ।

‘दमौलीमा पहिला हाटबजार लाग्थ्यो, बिस्तारै हरायो, एकादशी बजार हराउन थाल्यो, माघे संक्रान्ति मेला हराउन थाल्यो, पुराना परम्परा हराउँदै जान थाले, यसको संरक्षणमा हामी लागेका छौ’, नगरप्रमुख न्यौपानले भने, ‘हाटबजारले किसान र उपभोक्ताबीच सिधा सम्पर्क गराएर दुबै पक्षले उचित मूल्यमा कृषि सामग्री खरिद बिक्री गर्न पाउने अवसरको सिर्जना गर्ने योजनामा हामी छौं ।’

किसानले गाउँबाट तरकारी ल्याएर दमौलीका विभिन्न चोक र चौतारामा बसेर बिक्री गर्दै आएकामा अब यस ठाउँमा ल्याउने प्रयत्न गरिने उनले बताए । नगरपालिकाले यस ठाउँमा १३ व्यापारिक कक्ष निर्माण गरेको छ । ती कक्ष किसानका लागि निःशुल्क उपलब्ध गराइने भएको छ ।

यस्तै, हाटबजारको शुभारम्भ गर्दै तनहुँ क्षेत्र नं १ का प्रतिनिधिसभा सदस्य डा स्वर्णिम वाग्लेले युवामय हुँदै गएको नेपाल र प्रविधिमैत्री बन्दै गएको नेपालमा अबको समय अनलाइनको भएकाले यसलाई अनलाइनसँग जोड्न ध्यान दिनुपर्ने बताए । उनले भने, ‘यसले गर्दा किसानले सोझै मूल्य पाउन सक्नेछन्, त्यसतर्फ ध्यान दिनुपर्छ ।’

व्यास-५ मा ड्रागन फ्रुट खेती गर्दै आएकी कल्पना गौलीले हाटबजारले कृषि उपज सामग्री बिक्री वितरणका लागि सहयोग पुग्ने बताइन् । उनले भनिन्, ‘लोप भइसकेको हाटबजार नगरपालिकाले पुनः सञ्चालनमा ल्याउँदा हामी कृषक र उपभोक्ताका लागि राम्रो हो, अब यसको निरन्तरता मुख्य कुरा हो ।’

तनहुँकै आँबुखैरेनी गाउँपालिकाले पहिलो पटक हाटबजार शुभारम्भ गरेको थियो । प्रत्येक शुक्रबार आँबुखैरेनी-३ मा हाटबजार सञ्चालन हुँदै आएको छ । त्यहाँ गाउँपालिकाभित्रका बासिन्दाले कृषि उपज बिक्री गर्दै आएका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर