भानुमा चाडपर्व लक्षित बजार अनुगमन

तनहुँको भानु नगरपालिकाले चाडपर्व लक्षित बजार अनुगमन कार्य अगाडि बढाएको छ । वडा नं. १ को डुम्रे-साजबोटे क्षेत्रमा बुधबार चाडपर्व लक्षित अनुगमन गरिएको हो ।

नेपालीहरुको महान चाड दशैं, तिहार लगायतका चाडपर्वमा बजारमा हुन सक्ने कालोबजारी, अखाद्य बस्तुको बिक्री वितरण, मापदण्ड विपरित दर्ता बिनाका व्यवसाय, सरसफाईको अवस्था लगायतका विषयमा अनुगमन गरिएको भानु नगरपालिकाका उप-प्रमुख एवं अनुगमन समिति संयोजक उमा गोतामेले बताइन् ।

चाडपर्वको मौका छोपी हुन सक्ने कालोबजारीलाई नियन्त्रण गर्ने कार्य अन्तर्गत बजार क्षेत्रहरुमा अनुगमन गरिएको प्रमुख प्रशासकीय अधिकृत दिवाकर पौडेलले बताए । भानु नगरपालिका अन्तरगतका मुख्य बजारहरु भन्सार, तुरतुरे, बाईसजंगार, चन्द्रावती लगायतका बजार क्षेत्रमा अनुगमन गरिने उनले बताए ।

अनुगमनका क्रममा किराना पसल, होटल, खाजाघर, माछामासु लगायतका पसलहरुको अनुगमन गरिएको थियो । म्याद सकिएको अखाद्यवस्तु, ब्यवसाय दर्ता नगरि संचालन गरेको, मूल्यसुची टाँस नगरिएको, सरसफाईको कमि लगायतको कैफियत देखिएको नगरपालिकाका बरिष्ठ अधिकृत सुनिल पाण्डेले बताए ।

अनुगमनका क्रममा व्यवसाय दर्ता नगरेको भेटिएकाका लागि तत्काल ब्यवसाय दर्ता गरी संचालन गर्न, मूल्यसुची उपभोक्ताले देखिने गरी राख्न, सरसफाईमा ध्यान दिन निर्देशन दिइएको उनले बताए ।

उप-प्रमुख एवं अनुगमन समितिकी संयोजक गोतामे, वडा नं. १ की वडा अध्यक्ष कान्छीमाया तामाङ, बरिष्ठ अधिकृत सुनिल पाण्डे, इलाका प्रहरी कार्यालय भानुका प्रमुख प्रहरी निरीक्षक शुसिल घिमिरे लगायतको टोली बजार अनुगमनमा खट्टएिको थियो।

सेयर गर्नुहोस्

प्रतिक्रिया दिनुहोस्

सम्बन्धित खवर