पृथ्वीराजमार्गको तनहुँस्थित घाँसीकुवा-तालघारे खण्ड अवरुद्ध, वैकल्पिक मार्गबाट यातायात सूचारु
भञ्ज्याङन्यूज
पृथ्वीराजमार्ग अन्तर्गत तनहुँको व्यास नगरपालिका-१ मुसेखोलामा पहिरोको जोखिम बढेपछि घाँसीकुवा-तालघरे सडक खण्ड अवरुद्ध गरिएको छ ।
राजमार्ग चारलेनमा विस्तार गर्नेक्रममा व्यास-१ मुसेखोला ३७+६०० नजिकै भित्तो कटान गर्दा करिब ७० मिटर माथीबाट पहाडै पहिरो खस्ने जोखिममा पुगेको छ ।
आज शुक्रबार बिहान ११:३० बजे पृथ्वीराजमार्ग सडक विस्तारको क्रममा सडकको करीव ७२ मिटर माथिबाट जमिन चिरा परेकाले वैकल्पिक मार्ग प्रयोग गरी आज दिउँसबाट यातायात सुचारु गरिएको आँवुखैरेनी-जामुने सडक विस्तार योजनाका इन्जिनियर विष्णुप्रसाद पाण्डेले जानकारी गराए ।
जमिन चिरापरेकाले जुनसुकै बेला पनि पहिरो खस्ने अवस्था रहेकाले वैकल्पिक मार्ग प्रयोग गर्न लगाईएको जिल्ला प्रहरी कार्यालय तनहुँका प्रमुख अपिलराज बोहोराले बताए ।
सडकमा माथिबाट ढुङ्गा माटो झरिरहेकोले मुग्लिन पोखरा सडक योजना पुर्वी सडक खण्डसँग समन्वय गरी सबै सवारीसाधन तालघरेबाट रानीगाउँ हुँदै घासीकुँवा निस्कने भित्री सडक खण्ड प्रयोग गरिएको उनले बताए ।
वैकल्पिक मार्ग साँघुरो हुँदा यातयातका साधन एकतर्फि रुपमा सञ्चालन गरिएको हुँदा यो खण्डमा यात्रुले सास्ति झेल्नुपरेको छ ।
यस्तै, जिल्ला प्रशासन कार्यालय तनहुँले एक सूचना जारी गर्दै मुसेखोला क्षेत्रमा सडक खण्ड विस्ताका क्रममा सडकको अन्दाजी ७२ मिटर माथीबाट अन्दाजी १०० मिटर जमिन चिरा परेको र जुनसकै बेला पहिरो खस्न सक्ने र ढुंगा माटो झरिरहेकाले सबै सवारी साधन तालघरेबाट रानीगाउँ हुँदै घाँसीकुवा निस्कने भित्री सडक खण्ड वा अन्य वैकल्पिक मार्ग प्रयोग गरी आवागमन गर्नुहुन अनुरोध गरेको छ ।
